600 aqtóbelik kásiporyn jumysshylarynyń aılyǵyn kóterdi
AQTÓBE. QazAqparat - Aqtóbe oblysynyń ákimdiginde óńir basshysy Berdibek Saparbaevtyń tóraǵalyǵymen oblys ákimdigi, oblystyq kásipodaq ortalyǵy men kásiporyn basşylarynyń ózara yntymaqtastyq týraly úshjaqty memorandýmdardy oryndaý máselelerine qatysty jınalys ótti.
2018 jyly oblysta óndiristik protsesterdi turaqtandyrý, eńbek quqyǵy men jumysshylardyń kepildigin qamtamasyz etý boıynsha barlyǵy 4781 memorandýmǵa qol qoıyldy, dep habarlaıdy aımaq basshysynyń baspasóz qyzmeti.
Eńbek ınspektsııasy basshysynyń mindetin atqarýshy Baýyrjan Orazaevtyń aıtýynsha, olardy júzege asyrý nátıjesinde byltyr oblystaǵy 591 kásiporynda eńbekaqy kóterildi. Mysaly, 2018 jylǵy qańtardan bastap «SNPS-Aqtóbemunaıgaz» AQ qyzmetkerleriniń jalaqysy 12 - den 23%-ǵa deıin, «SNPS - Aqtóbe Kólik Kompanııasy» JShS - 7-23% - ǵa deıin, «Qazaqoıl Aqtóbe» JShS-de, «Voshod-Oriel» JShS-de, «Voshod Hrom» JShS-de, «ARBZ» JShS-de, «Vostok neft ı Servısnoe obslýjıvanıe» JShS-de, «Bazalt-A» JShS-de jáne basqa da kásiporyndarda 10% - ǵa kóterildi.
Berdibek Saparbaev qyzmetkerlerdiń eńbek quqyqtary men kepildikterin qamtamasyz etý boıynsha memorandýmdar jasaý tájirıbesi bıyl da jalǵasyn tabatynyn atap ótti. Ol oblystaǵy kásiporyndar men uıymdarda ujymdyq sharttar jasaýdy qamtamasyz etýdi, olarda kásipodaqtar qurý jumysyn jalǵastyrýdy tapsyrdy.
Búgingi tańda oblys boıynsha 8 600-den astam ujymdyq shart jasaldy, onyń ishinde 95% iri jáne 94,7% orta kásipkerlik sýbektileri. Ótken jyly eńbek ınspektsııasy Ujymdyq shart boıynsha mindettemelerdi oryndamaýdyń jáne buzýdyń bes dereginiń jolyn kesti. Mysaly, "Energosıstema" JShS jalpy somasy 103 mıllıon teńgege 1 800 qyzmetkerge emdik járdemaqy tólemegen. Barlyq anyqtalǵan buzýshylyqtar boıynsha olardy joıý týraly uıǵarymdar berilip, ákimshilik aıyppuldar salyndy.
Sonymen qatar, aımaq basshysy eńbek ınspektsııasy tarapynan baqylaýdyń nashar ekenin atap ótti.
«Kásiporyndar men uıymdar basshylarynyń ózderiniń menshik nysanyna qaramastan qabyldaǵan mindettemeleri oryndalýy tıis. Ózge jaǵdaıda tártip buzýshylar jaýapqa tartylady. Memorandýmdar, ujymdyq sharttar qarapaıym qyzmetkerlerdiń múddelerin qorǵaıdy, sondyqtan oblys aýdandarynyń ákimderin, ýákiletti memlekettik organdardy 2019 jylǵa osy mańyzdy qujattardy jasaýǵa daıyndalýlaryn jáne jaýapkershilikpen qaraýlaryn suraımyn», - dedi jınalysty qorytyndylaǵan Berdibek Saparbaev.
