60-tan joǵary: Astanada egde jastaǵy 15 jup nekege turdy
ASTANA. QazAqparat - Bıyl Astanada 60 jáne odan joǵary jastaǵy 15 jup nekelerin zańdastyrǵan, dep habarlaıdy QazAqparat elorda ákimdiginiń resmı saıtyna silteme jasap.
Jergilikti AHAT qyzmetinen málim etkendeı, ústimizdegi jyldyń 1 qańtarynan bastap 30 qyrkúıekke deıin Astanada 60 jáne odan joǵary jastaǵy 15 jup qarym-qatynastaryn zańdastyrǵan.
Eń joǵary jastaǵy jup Esil aýdanynda shańyraq qurǵan. AHAT mamandary otaǵasynyń 74 jasta, al jubaıynyń 69 jasta ekendigin aıtýda.
Saryarqa aýdanynda turatyn 69 jastaǵy erli-zaıyptylar egde jasta úılengenderdiń tiziminde ekinshi orynda tur. AHAT qyzmetkerleriniń aıtýynsha, olar nekege turýǵa uzaq ýaqyt oılanǵan. Qarym-qatynastaryn zańdastyrýǵa týǵan-týystary men jaqyndarynyń úgitteýi sebep bolǵan.
«Biz kún saıyn túrli jastaǵy, túrli adamdardy kóremiz. Jasy egde adamdar munda kóterińki kóńil-kúımen keledi. Uqypty kıinip kelip, qýanyshtan júzderi bal-bul janyp turady», - deıdi Saryarqa aýdandyq AHAT bóliminiń basshysy Baqytgúl Shaıkenova.
Aıta keteıik, 1 qazan kúni búkil álem boıynsha Qarttar kúni toılanady. BAQ málimetinshe, Qazaqstanda 2 mıllıonǵa jýyq zeınetker bar.
