60-tan astam tasymaldaýshy bilmestikpen 119 kólikti tirkegeni úshin tólemeýi tıis alymdardy tólep kelgen
ASTANA. KAZINFORM – 2023 jyldyń 1 qańtarynan bastap QR Salyq kodeksindegi ózgeristerge sáıkes otandyq halyqaralyq tasymaldaýshylar úshin N3 sanattaǵy mehanıkalyq kólik quraldaryn (ershikti tartqyshtar) bastapqy memlekettik tirkegeni úshin alymdar joıylǵan.
Alaıda, prokýratýranyń taldaýy kórsetkendeı, 60-tan astam tasymaldaýshy bul alymdardy tóleýdi jalǵastyrǵan, nátıjesinde 119 kólik quraly úshin bıýdjetke negizsiz shamamen 18 mln teńge túsken.
«Búgingi kúnde prokýratýranyń bastamasymen 7 kásipkerge 4,9 mln teńge qaıtaryldy. Salyq tóleýshiler qarajatty qaıtarý úshin óz betinshe memlekettik kirister organdaryna ótinishpen júginý qajet», — dep habarlady Bas kólik prokýratýrasy.
Osyǵan baılanysty, kólik prokýratýrasy otandyq tasymaldaýshylardy artyq tólengen alymdardy qaıtarý úshin kólik quraldaryn tirkeý orny boıynsha salyq organdaryna júginýge shaqyrady.
