60 mln. halqy bar Italııada - 65, al 16 mln. halqy bar Qazaqstanda 144 joǵary oqý orny jumys isteýde - S. Tursynov
ASTANA. Qazannyń 28-i. QazAqparat /Qanat Mámetqazyuly/ - 60 mln. halqy bar Italııada 65 joǵary oqý orny bolsa, 16 mln. halqy bar Qazaqstanda 144 joǵary oqý orny jumys isteýde.
Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Saǵynbek Tursynov osylaı málim etti, dep habarlaıdy QazAqparat.
«Búgingi kúni elimizde maman daıyndaý jáne joǵary oqý oryndaryn bitirgen jastardy jumyspen qamtý máselesi kúrdelenip barady. Resmı statıstıka boıynsha, aǵymdaǵy jyly 196 myń 700 stýdent joǵary oqý oryndaryn bitirse, onyń 100 myńǵa jýyǵy jumyssyzdar qataryn tolyqtyryp otyr eken. Eń bastysy, kóptegen jastar óz mamandyǵy boıynsha qyzmet taba almaıdy. Bunyń negizgi sebebi - memleket tarapynan maman daıyndaýdy tıimdi josparlaý men retteýdiń álsizdigi», dedi S. Tursynov.
Depýtattyń aıtýynsha, álemdik tájirıbemen salystyrǵanda Qazaqstanda jumys isteıtin joǵary oqý oryndarynyń sany tym kóp bolyp otyr. Biraq, ondaı oqý oryndarynyń basym bóliginde bilim berý sapasy syn kótermeıtin deńgeıge jetken. «Máselen, 60 mln. halqy bar Italııada 65 joǵary oqý orny, 63 mln. halqy bar Frantsııada 41 JOO, 60 mln. halqy bar Ulybrıtanııada 102 JOO bar. Al Qazaqstan halqynyń sany 16 mln. bola turyp, bizde 144 joǵary oqý orny jumys isteýde. Bulardyń basym bóligi shyǵyndy az talap etetin gýmanıtarlyq mamandyqtarǵa baǵyttalady. Osynyń saldarynan gýmanıtarlyq, ekonomıkalyq mamandyq ıeleri josparsyz kóp daıyndalyp, olardy bitirgender jumyssyz júr. Esesine, orta kásiptegi mamandardy shetelden ákelemiz», dedi depýtat.
Sonymen birge, saladaǵy qordalanǵan máselelerge toqtalǵan S. Tursynov, JOO bitirgen biraq jumyssyz júrgen jastardy eńbekpen qamtý úshin naqty sharalar jasaý qajettigin atap ótti.
