60 myńnan astam qazaqstandyq ekovolonterlikke jumyldyrylǵan
ASTANA. KAZINFORM — Búginde Qazaqstanda ekologııalyq volonterler qatary kóbeıip keledi. 2024 jyly ekovolonterlikke 40 myńnan astam adam qatyssa, byltyr olardyń sany 60 myńnan asty. Bul týraly Mádenıet jáne aqparat mınıstrliginiń baspasóz qyzmeti habarlady.
Ótken jyldan bastap QR Mádenıet jáne aqparat mınıstrliginiń qoldaýymen «Ár qadamda ekosanalyq» atty granttyq jobasy bastaldy. Jobany «Taza Qazaqstan» respýblıkalyq aktsııasy aıasynda Green Steppe uıymy júzege asyrýda. Onyń aıasynda sarapshylardyń qatysýymen vebınarlar uıymdastyrylyp, elimizdiń barlyq óńirinen 300-den astam adam qatysty. Sonymen qatar shamamen 1000 ekoaktıvıst arnaıy ázirlengen bilim berý kýrsynan ótti.
Aıta keteıik, jyl basynan beri joba aıasyndaǵy is-sharalarǵa 2000-nan astam volonter qatysty. Bıyl ekologııalyq volonterliktiń damý deńgeıin taldaýǵa baǵyttalǵan «Qazaqstandaǵy ekovolonterlik — 2026» atty zertteý júrgizý josparlanyp otyr.
Budan bólek, ekovolonterlikti damytý aıasynda birqatar aýqymdy jumystar atqaryldy. Máselen, «10 jasyl kún» eko-chellendjine 2000-nan astam adam qatysyp, 10 ekologııalyq tapsyrma oryndady. «Jas aǵash» aktsııasy aıasynda 10 myńnan astam volonter men bıznes ókilderi bes ulttyq park pen qoryq aýmaǵynda 300 myńnan astam aǵash ekti.
«Eko baqylaý» jobasy sheńberinde 50-den astam monıtorıngtik reıd uıymdastyryldy. Halyqaralyq World Cleanup Day aktsııasy barysynda 4000-nan astam qatysýshy 22 lokatsııada tazalyq jumystaryn júrgizdi. «Taza Kaspıı — Clean Caspian» ekologııalyq bastamasyna Qazaqstan men Ázerbaıjannan 2 000-nan astam volonter qatysty. Olar úsh jaǵalaý aýmaǵyn tazartyp, 3 tonnadan astam qoqys jınady.
Bul kórsetkishter qoǵamda ekologııalyq jaýapkershilikke degen qyzyǵýshylyqtyń artqanyn jáne BUU-nyń Turaqty damý maqsattaryna qol jetkizýge degen umtylysty aıqyn kórsetedi.
Eske salsaq, budan buryn ekologııalyq aıyppuldardan túsetin qarjy aýyldyq okrýgterdiń bıýdjetine beriletinin jazǵan edik.
