60 myńǵa jýyq turǵyny bar Qarabulaq aýyly nege qala mártebesin alǵysy kelmeıdi
ASTANA. KAZINFORM – 60 myńǵa jýyq turǵyny bar Qarabulaq aýyly turǵyndary eldi mekenge qala mártebesin berýge qarsy. Bul týraly Túrkistan oblysynyń ákimi Darhan Satybaldy aıtty.
Búgin Úkimet otyrysynda Premer-mınıstr Oljas Bektenov Túrkistan oblysynyń ákimi Darhan Satybaldydan: «Elimizdegi eń úlken eldi mekenniń biri – Qarabulaq aýyly. Onda 60 myńǵa jýyq adam turady. Bul aýylǵa qatysty ne aıtasyz? Onyń mártebesin ózgertemiz be?» - dep suraǵan edi.
Oblys ákiminiń aıtýynsha, Qarabulaq – Saıram aýdanyndaǵy halqy tyǵyz ornalasqan aýyldardyń biri.
«Qazaqstannyń ákimshilik aýmaqtyq qurylysy týraly» zańǵa sáıkes oblystyq jáne aýdandyq mańyzy bar qalaǵa jatqyzý úshin iri ekonomıkalyq jáne mádenı ortalyqtar bolyp sanalatyn damyǵan óndiristik jáne áleýmettik ınfraqurylymy bar eldi mekender kiredi. Statıstıkalyq málimetterge sáıkes, Qarabulaq aýylynyń halyq sany 53 myńnan asady. Aýylda 20 mektep, 14 jekemenshik balabaqsha, 2 kolledj, 9 densaýlyq saqtaý mekemesi, 1 mádenıet úıi qyzmet kórsetedi. Qarabulaq – agrarly aýyl. Aýdan boıynsha óndiriletin aýyl sharýashylyǵy ónimderiniń 30 paıyzy osy aýylǵa tıesili», - dedi óńir basshysy.
Onyń atap ótýinshe, 2023 jyldyń qorytyndysy boıynsha 42 mlrd teńgege aýyl sharýashylyǵy ónimderi óndirildi. Aýdan boıynsha iri qara mal basynyń 47 paıyzy Qarabulaq aýylyna tıesili.
«Aýdandyq mańyzy bar nemese oblystyq mańyzy bar mártebesin bergen jaǵdaıda aýyl turǵyndary birqatar múmkindikten shekteledi. Olar - UBT kezinde oqýshylarǵa beriletin aýyldyq kvota, «Dıplommen aýylǵa» baǵdarlamasy boıynsha jas mamandarǵa kórsetiletin áleýmettik qoldaý, «Aýyl amanaty» baǵdarlamasy, «Aýyl – el besigi» baǵdarlamasy aıasynda áleýmettik ınfraqurylymdyq jobalar. Qala mártebesin alǵan jaǵdaıda aýyl turǵyndarynyń negizgi kásibi – mal sharýashylyǵyn damytýǵa múmkindik bolmaı qalýy yqtımal. Eldi mekenge aýdandyq mańyzy bar qala mártebesin berý týraly jergilikti turǵyndarmen kezdesý ótkizip, bul máseleni talqylady. Olardyń bári qarsy bolyp otyr. Biz de muny tıimsiz dep oılaımyz», - dedi Darhan Satybaldy.
