60 mıllıonǵa aldaǵan: Almatyda qarjylyq pıramıda qurǵandarǵa sot úkimi shyqty

ALMATY. KAZINFORM — Almaty qalasy Almaly aýdandyq sotynda qarjy pıramıdasyn qurǵan úsh azamatqa qatysty qylmystyq is qaraldy.

Qalalyq sot málimetine sáıkes, sottalýshylar sheteldik azamattarmen sóz baılasyp (olarǵa qatysty qylmystyq is bólek óndiriske bólingen) bolashaq ınvestorlarǵa aqsha operatsııalaryn baqylaı alatyndaı ınternet-platformasyn qurǵan. Klıentter áleýmettik jelilerde jarnamalaý, kitapshalardy taratý, onlaın trenıngter ótkizý, ınvestıtsııalyq kompanııa retinde jobasyn pozıtsııalaý jáne árbir ınvestorǵa salynǵan somanyń 5-ten 15%-ke deıin aı saıyn alatynyna ýáde berý arqyly tartylǵan.

— Alaıaqtyq barysynda 13 adamǵa jalpy somasy 59 894 237 teńge materıaldyq shyǵyn keltirilgen. Sottalýshylar kinálaryn moıyndamady. Sot úkimimen A., K., S. qarjy pıramıdasyn qurý jáne basqarý boıynsha kináli dep tanylyp, jábirlenýshilerdiń azamattyq talaptaryn qanaǵattandyra otyryp, 5 jyl bas bostandyǵynan aıyrý jazasy taǵaıyndaldy, - dep habarlaıdy Almaty qalasynyń sotynan.

Sot úkimi zańdy kúshine engen joq.