60 mıllıon dollar: Djennıfer Lopes pen Ben Afflek nesıege úı satyp aldy
Djennıfer Lopes pen Ben Afflek nesıege úı satyp aldy. Beverlı-Hıllzdan tapqan 60 mıllıon dollarlyq baspanany Gollıvýd juldyzdary birneshe jyl boıy izdegen. Armanyndaǵy úıge qol jetkizý úshin erli-zaıyptylar 20 mıllıon dollarǵa nesıe rásimdeýdi uıǵarǵan, dep habarlaıdy Kazinform The U.S. Sun basylymyna silteme jasap.
Záýlim saraıda 12 jatyn bólme, 24 jýynatyn bólme, sonymen qatar jeke jabyq sport kesheni men 92 kólikke arnalǵan avtoturaq bar. Úı olardyń bıznes-menedjerleri Gerı Kress jáne Braıan Merfımen baılanysy bar senimgerlik qor arqyly alyndy.
Buǵan deıin jubaılar qolma-qol aqshaǵa jyljymaıtyn múlik satyp alýdy josparlap otyrǵany habarlanǵan bolatyn. Biraq olar qarjylyq múmkindikterin qaıta qaraýdy sheshken kórinedi. 31 tamyzda qol qoıylǵan kelisimshart boıynsha Djennıfer Lopes pen Ben Afflek JPMorgan Chase Bank-ten 30 jylǵa nesıe alǵan.
Alǵashqy 6 jylda paıyzdyq mólsherleme 5,5% bolady da, keıin ósedi. Negizgi soma men paıyzdy tóleýdi olar 2033 jyldyń qarashasynda bastaıdy.
Amerıkalyq sarapshylardyń pikirinshe, jubaılar qaryzǵa batyp jatqandaı kóringenimen, shyn máninde, bul – olar úshin óte tıimdi nusqa.
«Salyq jeńildigin alý úshin baı adamdar arasynda mundaı tásil jıi qoldanylady. Olardyń aktıvterin qarastyryp, kez kelgen qadam aldynda tıimdi joldy tańdap beretin qarjy keńesshileri bar ekeni belgili nemese ózderi sheshim qabyldaýy da ábden múmkin», - dep atap ótti Los-Andjelestegi rıeltor Tonı Marıottı.
