60 kelide altyn medal qazaq balýanynda - Qazaq kúresinen Azııa chempıonaty

ASTANA. QazAqparat - Elordanyń «Dáýlet» sport kesheninde Qazaq kúresinen ótip jatqan Azııa chempıonatynyń 60 kelige deıingi salmaq dárejesindegi básekesi sońyna jetti. Tartysty beldesýde qazaq balýany Ospan Daýylbaı Ózbekstannan kelgen Shohrýh Nýrıddınovten basym tústi, dep habarlaıdy QazAqparat tilshisi.

Qos qarsylastyń básekesi óte tartysty ótti. Ábjildikterin tanytqan qos balýan bir-birine berispeı baqty. Aqyry teketirestiń aıaǵy beldesýge ulasqan edi. Tartysty beldesýdiń sońynda jeńis Ospan Daýylbaıdyń enshisine buıyryp, jalpy qazaq balýandarynyń altyn medaliniń sany úshke jetti.

60 kelige deıingi salmaqta qola medaldi Mońǵolııa balýany Lhagvajamts Ýnıbjled pen Japonııa balýany Ippeı Nakano men Irannan Sajjad Karamıan Gandombanı bólisti.

Aıta ketsek, osyǵan deıin Azııa chempıonatynda 6 salmaq boıynsha birinshi oryndar 2 qazaq jáne 3 mońǵol, 1 túrikmenstandyq balýandarynyń enshisinde ketti.

Eske sala ketsek, Elordadaǵy «Dáýlet» sport kesheninde Qazaq kúresinen Azııa chempıonaty ótip jatyr. Azııa chempıonatynda 11 elden 77 balýan 8 salmaq dárejesi boıynsha synǵa túsýde. Chempıonatta Qazaqstan sortshylarymen birge Mońǵolııa, Tájikstan, Túrikmenstan, Pákistan, Ózbekstan, Shrı-Lanka, Japonııa, Iran, Qyrǵyzstan, Úndistannan kelgen sportshylar ózara baq synasty. Jalpy chempıonattyń júlde qory 20 myń AQSh dollaryna baǵalanýda.