60 qazaqstandyq kompanııa «Qazaqstan halqyna» qoryna 131 mlrd teńge aýdardy

ASTANA. KAZINFORM - «Qazaqstan halqyna» QQ Basqarma tóraǵasy Bolat Jámishev qorǵa qaı uıymdar qarajat aýdaryp jatqanyn aıtty.

«Bizdiń qordyń janashyrlary nazardan tys qalyp otyrǵan joq. 100 mıllıonnan astam aýdarǵandardy ǵana alatyn bolsaq, 196 mıllıard teńgeniń 131 mıllıardyn 60 kompanııa aýdarǵan. Onyń 39-y jaýapkershiligi shekteýli seriktestik, 16-sy aktsıonerlik qoǵam, sondaı-aq bes qor bar. ıAǵnı, negizgi soma qazaqstandyq kásiporyndardan túsken», - dedi B. Jámishev Ortalyq kommýnıkatsııalar qyzmetindegi dóńgelek ústel otyrysynda.

«Ulttyq ál-aýqat qory týraly» Zańǵa sáıkes, jyl saıyn «Samuryq-Qazyna» qory taza tabysynyń keminde 7 paıyzyn «Qazaqstan halqyna» qoǵamdyq qoryna aýdaratyn bolady.
2022 jylǵy qarjylyq eseptiliktiń qorytyndysy boıynsha «Samuryq-Qazyna» qory «Qazaqstan halqyna» qoryna 66,6 mlrd teńge kóleminde qarajat bóldi. Bul rette, 20,6 mlrd teńgesi alǵashqy jarna retinde tústi. Qalǵan soma kelisimge sáıkes 2024 jylǵy naýryzǵa deıin jiberiletin bolady. Bul qarajat Qazaqstan Respýblıkasynda onkologııalyq aýrýlarmen kúres jónindegi 2023-2027 jyldarǵa arnalǵan Keshendi josparda kózdelgen is-sharalardy iske asyrýǵa jáne orfandyq aýrýlary bar azamattardy dárilik preparattarmen qamtamasyz etý jónindegi bekitilgen tásilderge sáıkes 2024 jyly dári-dármek satyp alýǵa jumsalady.

Atap aıtqanda, 2 jyl ishinde «Qazaqstan halqyna» qory jalpy somasy 90,9 mlrd teńgege qaıyrymdylyq kómek jasady.