60-100 myń arasynda: Rınat Zaıytov mádenıet qyzmetkerleriniń jalaqysyn kóterýdi surady
«Birinshiden, meniń sizge joldap otyrǵan saýalymnyń artynda Qazaqstannyń ondaǵan myń mádenıet salasy qyzmetkeri tur. Ekinshiden, bul - «AMANAT» partııasynyń saılaýaldy baǵdarlamasyna enip, halyqqa bergen ýádesi. Memleketimizdiń ıdeologııasyn durys júrgizýde jáne otanymyzdy alys-jaqyn shetelderge tanystyrýda mádenıettiń atqaryp jatqan jumysy az emes. Respýblıkamyz boıynsha eleýli eńbek etip jatqan 56 teatr, 20 fılarmonııa, 267 murajaı, 3891 kitaphana bar. Ol az deseńiz, Qazaqstan boıynsha qanshama mádenıet úıleri jáne taǵy sol sııaqty birneshe óner ujymdary da bar. Ǵ.Músirepovtiń «Adam ónerdi qanshalyqty jaqsy kórse, sonshalyqty qorǵaýǵa mindetti» degen nasıhat sózi bar. Ókinishke qaraı, biz búgingi kúnde memlekettiń aınasy bolyp otyrǵan mádenıet qyzmetkerlerin múldem eskerýsiz qaldyrdyq», - dedi Májilis depýtaty.
Onyń atap ótýinshe, mádenıet salasynyń qyzmetkerleri degenimiz – tek qana sahnada óner kórsetetin tulǵalar emes, solardyń jaǵdaıyn jasap otyrǵan sahna syrtyndaǵy eńbek adamdary.
«Olar memleketine shynaıy mahabbatpen qarap, mádenıetke bar yqylasymen qyzmet etetin: sahna tehnıkteri, kostıýmerler, grımerler, jaryq túsirýshiler, dybystaýshy degen sııaqty myńdaǵan adamdar. Janǵa batatyn bir jaıt, bul atalǵan qyzmetkerler áli kúnge deıin sanaty joǵarylap, jalaqysy ósip jatqan ustazdar, dárigerler sııaqty mamandar qatarynan da oryn alǵan joq. Qazirgi tańda qaı mekemeni alsańyz da, mádenıet salasy qyzmetkerleriniń jalaqysy 60 myń teńgeden bastalyp, 100 myń teńgege jeter-jetpes mejeden asa almaı tur. Eńbekaqynyń tómendigi bilikti mamandardyń jumystan óz erkimen ketip, mádenıet oshaqtarynyń jumysyn turalatýǵa ákelip soǵady. Qurmetti Altaı Seıdiruly, osy oraıda, men Qazaqstan Respýblıkasy Úkimetiniń «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» 2015 jylǵy 31 jeltoqsandaǵy № 1193 qaýlysynyń qosymshasyna mádenıet, arhıv jáne kitaphana qyzmetkerleriniń koefıtsentterin ózgertip, jalaqysyn ósirýińizdi suraımyn», - dedi Rınat Zaıytov.
