«6 jylda 60 ese azaıǵan bekireni brakonerlerden saqtaýǵa naqty shara qoldanylmaı otyr» - BAQ-qa sholý
***
«Iá, atam zamannan el baılyǵy kimge qoldy bolmaı keledi deısiz? Áli de sol, antalaǵan azýlylar asap, bıligi barlar tonap, jemqorlar sybaılasa julyp, jutyp jatyr. Jese dámi til úıiretin, jemese túske enetin bekire tuqymdas balyqtyń dámin tatpaǵan jan joq shyǵar. Jegen adam onyń eti de, qara ýyldyryǵy da teńdessiz ekenin jaqsy biledi. Alaıda, amal ne, óz táýelsizdigimizdi ózimiz qolǵa alǵan shaqta da el baılyǵy elenbeı qaldy. Senesiz be, senbeısiz be, Jaıyq-Kaspıı basseınindegi bekire tuqymdas balyq 2006 jylǵy 61 mln. danadan 2012 jyly 1 mln-ǵa bir-aq azaıǵan. Bir mıllıon dep kótermelep aıtý ǵoı, múmkin qazir odan da kem qalǵan shyǵar. Sonda mundaı kúıge jetkizgen kim? Jaýap beretin bireý bar ma?», - dep jazady «Egemen Qazaqstan» gazeti. Bul jaıynda tolyq bilgińiz kelse, basylymdaǵy «6 jylda 60 ese azaıǵan bekireni brakonerlerden saqtaýǵa naqty shara qoldanylmaı otyr» degen maqalany oqyńyz.
«Egemen Qazaqstan» gazetiniń jazýynsha, 1 mamyr - Qazaqstan halqynyń birligi kúni qarsańynda Oral qalasyndaǵy «Zenıt» zaýytynyń qurysh qoldy konstrýktorlary ózderiniń baǵa jetpes ónimin sýǵa túsirý alańyna jetkizdi. Bul oryn erke Shaǵannyń jaǵalaýy bolatyn. Al bul ónim buǵan deıin elimizdiń Áskerı-teńiz kúshterinde qoldanylyp júrgen zymyrandy-artıllerııalyq kemeniń teńdesi joq kezekti jobasy edi. Bir sózben aıtqanda, memleketimizde qabyldanǵan Áskerı doktrına talaptaryna saı qurastyrylǵan jańa korabldiń tehnıkalyq jaraqtandyrylýy álemdik standarttyń barlyq talaptaryna tolyq jaýap bere alady. Otandyq jańa ónim ashyq teńizdiń barlyq qaterli syndaryna tótep berýge qabiletti bola alýymen erekshelenedi. Oǵan teńizdiń daýyly men kókke shapshyǵan tolqyndary da bóget emes. Jańa korabldiń ekıpajy - 23 adamnan turady. Munyń syrtynda medıtsınalyq kaıýtada eki adam ornalaspaq. Bul maqala «Áskerı doktrına talabyna saı kezekti zymyrandy-artıllerııalyq korabl sýǵa túsirildi» degen taqyryppen berilgen.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev salynyp jatqan Qazaqstan tarıhy murajaıynda boldy. Nursultan Nazarbaev qurylys jumystary barysymen jáne murajaı ǵımaratyn paıdalanýǵa berý jónindegi josparmen tanysty. Murajaıdyń ekspozıtsııasy men kórmesi Qazaqstannyń ejelgi zamannan qazirgi kúnge deıingi tarıhy men mádenıetin kórsetýge arnalǵan. Kólemi 14 myń sharshy metrdi quraıtyn ekspozıtsııa alańy Tarıh murajaıy, Altyn jáne qymbat metaldar murajaıy, Óner murajaıy ekspozıtsııalaryn ornalastyrýǵa múmkindik beredi. Sonymen qatar, ekspozıtsııanyń edáýir bóligi ult mádenıeti men jazýynyń kóp ǵasyrlyq tarıhyna, sondaı-aq Táýelsiz Qazaqstan tarıhyna arnalatyn bolady.
Sondaı-aq, murajaı kezdesýler, forýmdar jáne bilim berý baǵdarlamalary ótetin oryn bolyp tabylady.
***
Qazaqstan Eýropalyq odaqtyń barlyq elderinen iri qara tasymaldaýǵa tyıym saldy. Buǵan Batysta Shmallenberg vırýsynyń oshaǵy sebep bolýda. Bul jaıynda búgingi sanynda «Ekspress-K» basylymy jazyp otyr. Gazettiń atap ótýinshe, bul másele kúzde bastalǵan bolatyn, ıaǵnı ol kezde Qazaqstan aldymen mal ósirý boıynsha eýropalyq shekteýli kásiporyndar úshin esikti japqan bolatyn, al qazir endi 27 elge tyıym salyp otyr. Búginde Qazaqstan iri qara mal basyn jetkizý turǵysynda tek Avstralııamen ǵana jumys isteýde. Al et búginde elimizge Reseıden, Belarýs, Argentına, Brazılııa, Kanada jáne Mońǵolııanyń eki aımaǵynan tasymaldanýda. Ónim súıeksiz túrinde úlken qoraptarda ákelinetin kórinedi. Bul ónimder tek et óńdeıtin kásiporyndarda, shujyq tsehtarynda paıdalanýǵa ruqsat etilgen. Importty taýardy bazarlarda saýdalaýǵa tyıym salynǵan. Sonymen qatar et ónimderin afrıkalyq elderden, Qytaıdan, Qyrǵyzstannan, Ózbekstannan, Túrkmenstannan tasymaldaýǵa shekteý engizilgen.
