6 jylda taǵy 4 mln qazaqstandyq gazǵa qol jetkizdi

QR Energetıka mınıstrligi baspasóz qyzmetiniń habarlaýynsha, osy kezeńde shamamen 4 mln qazaqstandyq tabıǵı gazǵa qol jetkizdi — gazben qamtamasyz etilgen halyq sany 9,1 mln adamnan 13,1 mln adamǵa deıin artty.

Osy jyldary gazdandyrý jumystaryna 1 myńnan astam eldi meken qamtylyp, 20 myń km gaz taratý jelisi salyndy.

Kórsetkishtiń ósýi gaz tasymaldaý jáne gaz taratý júıelerin damytýǵa, sondaı-aq jańa eldi mekenderdi gazǵa qosýǵa baǵyttalǵan ınfraqurylymdyq jobalardy iske asyrý nátıjesinde qamtamasyz etildi.

Tek 2025 jyldyń qorytyndysy boıynsha 94 eldi mekendegi 354 myńnan astam turǵyn tabıǵı gazǵa qol jetkizdi. Bir jyl ishinde shamamen 2 myń km gaz taratý jelisi salyndy.

2026 jyly gaz ınfraqurylymyn damytý jumystary jalǵasý ústinde. Qazirgi ýaqytta 40 joba iske asyrylyp jatyr, onyń ishinde 7 ótpeli jáne 33 jańa joba bar. Jobalardy iske asyrý aıasynda bıyl taǵy shamamen 36 myń adam tabıǵı gazǵa qol jetkizedi dep kútilýde.

Soltústik óńirlerdi gazdandyrý úshin «Esil – Astana» magıstraldyq gaz qubyryn salý jobasynyń mańyzy zor. Ony iske asyrý jónindegi memorandýmǵa Qazaqstan Úkimeti men «Gazprom» arasynda qol qoıyldy. Joba Astana, Kókshetaý jáne Petropavl qalalaryn senimdi gazben qamtamasyz etýge, sondaı-aq eldiń soltústik óńirlerine tabıǵı gaz jetkizý baǵyttaryn ártaraptandyrýǵa múmkindik beredi.

Gazdandyrýdy odan ári keńeıtý Memleket basshysynyń halyqtyń tabıǵı gazben qamtamasyz etilý deńgeıin 2035 jylǵa qaraı 80%-ǵa deıin jetkizý jónindegi tapsyrmasyna sáıkes júzege asyrylady.

-Gazdandyrý eldiń energetıkalyq ınfraqurylymyn damytýdyń negizgi baǵyttarynyń biri bolyp qala beredi. Halyqtyń tabıǵı gazǵa qoljetimdiligin keńeıtý ómir súrý sapasyn arttyrýǵa, óńirlerdi damytýǵa jáne Qazaqstannyń energetıkalyq qaýipsizdigin nyǵaıtýǵa yqpal etedi,-delingen habarlamada.

Osyǵan deıin elimizde jańartylatyn energııa úlesi 6 jylda 4 ese óskeni týraly jazdyq.