6 jylda 18 fýtbol klýbyn qarjylandyrýǵa 200 mlrd teńgeden astam qarjy bólingen – Antıkor
ASTANA. KAZINFORM – Sybaılas jemqorlyqqa qarsy is-qımyl agenttigi Týrızm jáne sport mınıstrligimen birlesip otandyq sportty qarjylandyrý salasyndaǵy jemqorlyq táýekelderine syrtqy taldaý júrgizdi.
Taldaý nátıjeleri boıynsha memlekettik qarajattyń tıimsiz jumsalýyna ákeletin birqatar faktor anyqtalyp otyr.
«Joǵary jetistikter» jáne «buqaralyq» sportty qarjylandyrý arasyndaǵy alshaqtyq 2023 jyly sporttyń joǵary jetistikterin qarjylandyrý buqaralyq sportqa qaraǵanda 9 ese kóp», - dedi Danııar Bıgaıdarov agenttikte ótken baspasóz máslıhatynda.
Odan ári agenttik ókili sebepterdi atady, aldymen qarjylandyrýdyń ashyq bolmaýy.
«Agenttik «óli jandarǵa» esepteýdiń, qosarlanǵan qarjylandyrýdyń (jan basyna shaqqandaǵy qarjylandyrý balalar jáne jasóspirimder sport mektebiniń tárbıelenýshilerine bólingen), týrıstik fırmalardyń qyzmetterin naqty baǵadan joǵary baǵamen satyp alýdyń, joǵary sporttyq bilim týraly dıplomdardy qoldan jasaýdyń júıeli faktilerin anyqtady», - deıdi ol.
Sonymen qatar sport uıymdarynyń tirkelmegen sport pánderi boıynsha jeńister úshin qosymsha aqy tóleý faktileri baıqalǵan.
«Bul tásil olımpıadalyq emes jáne keń taralmaǵan, jeńiske jetý ońaıyraq sport túrlerin damytýǵa túrtki bolady. Sport ǵımarattary memleket úshin qolaısyz jaǵdaılarda satylady jáne beriledi, sodan keıin osy obektiler jańa menshik ıelerinen jalǵa alynady. Odan bólek, ýákiletti organ vedomstvolyq baǵynysty uıymnyń jumys istemeıtin shtatyna qarajat bóledi», - deıdi resmı ókil.
Jemqorlyq táýekelderdiń taǵy biri – sport federatsııalary men kásibı klýbtardyń negizsiz qarjylyq shyǵyndary.
«Sońǵy 6 jylda tek 18 fýtbol klýbyn qarjylandyrýǵa 200 mlrd teńgeden astam qarjy bólingen. Mundaı shyǵyndarmen Qazaqstan FIFA álemdik reıtınginde tómen pozıtsııaǵa ornalasqan. Eń qymbat klýb «Samuryq-Qazyna» AQ – dan demeýshilik kómek alǵan «Astana» FK (50,1 mlrd teńge), odan keıin «Barys» hokkeı klýby (48,9 mlrd teńge). Sonymen qatar kóp bóligi eńbekaqy tóleý qoryna, birjolǵy tólemderge, transferge, agenttik kelisimderine jumsalǵan. Bul qarajatty ıgerý joǵary jemqorlyq táýekelderin týdyrady», - dedi D. Bıgaıdarov.
Odan bólek, óz ınfraqurylymynyń bolmaýyna baılanysty klýbtar jyl saıyn alańdar men muz aıdyndaryn jalǵa alýǵa mıllıondaǵan qarajat jumsaıtyn bolyp shyqty.
Sóz sońynda agenttik ókili joǵaryda atalǵan táýekelder boıynsha agenttik usynystar ázirlengenin jáne onyń oryndalýy baqylaýda ekenin aıtty.
