6 jyl túrme jáne májbúrli em: Jambyl oblysynda nashaqorǵa úkim shyǵaryldy

TARAZ. KAZINFORM – Shý aýdanynyń turǵyny marıhýana daıyndaý kezinde qolǵa túsken. Ol tek paıda tabý maqsatynda ǵana emes, esirtkige táýeldiligi saldarynan osyndaı áreketke barǵany úshin eń joǵary jazaǵa tartylmady, dep habarlaıdy Kazinform tilshisi.

Polıtseıler er adamdy tamyz aıynda túnde aýyl shetindegi jabaıy qarasorany jınaýǵa barǵan kezde ustaǵan. Oqıǵa ornyna jedel top kelgen sátte ol qarasorany oryp, keptirýge jaıyp qoıǵan eken. Ustalǵan azamattan 32 keli keptirilmegen qarasora tárkilendi. Bul kólem asa iri mólsherge jatady.

Saraptaı kele onyń gashıshke táýeldi ekeni jáne májbúrli emdi qajet etetini anyqtaldy. Tergeý barysynda er adam kinásin tolyq moıyndap, jasaǵan isine ókinish bildirgen. Sot ony esirtki zattaryn zańsyz saqtaǵany úshin kináli dep tanyp, 6 jylǵa bas bostandyǵynan aıyrý jazasyna kesip, jazasyn óteý barysynda májbúrli em qabyldaýǵa da mindettedi.

Aıta keteıik, Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy Jastar saıasaty jónindegi keńestiń otyrysy ótip, onda Nashaqorlyqqa jáne esirtki bıznesine qarsy kúres jónindegi 2026-2028 jyldarǵa arnalǵan keshendi jospardyń jobasy talqylanǵanyn habarlaǵanbyz.

Jýyrda Jambyl oblysynda avtokólikten 12 qap marıhýana tabyldy.

Al óńirler qazan aıynyń sońyna deıin nashaqorlyqqa qarsy jospar ázirleýi tıis.

Sondaı-aq Almatyda bıyl jarty tonnadan astam esirtki tárkilengenin habarlaǵanbyz.