6 jastaǵy bala daıarlyq synybyna qabyldana ma
AQTÓBE. KAZINFORM – Balabaqshada tárbıelengen balalar mekteptegi daıarlyq tobyna bara almaıdy. Al 6 jastaǵy balasyn áli kishkentaı dep oılaǵan ata-ana 7-ge tolǵansha kúte alady. Tek ony mektep te, balabaqsha da qabyldamaıdy.
Jańa oqý jylyna 1 aı ýaqyt qaldy. Qazir keıbir ata-ana 6 jasqa endi tolatyn balasyn mektepaldy daıarlyq tobyna berý jolyn izdep júr. Biraq ol múmkin emes.
– Balabaqshaǵa baratyn bala 5 jasynda mektepaldy daıarlyq tobynda bolyp, mashyqtanady. Al balabaqshaǵa barmaǵany 5 jasynda mektepaldy daıarlyq tobyna qabyldanady. 6 jasqa tolǵan, bıyl jyl sońyna deıin 6-ǵa tolatyn balalar 1 synypqa barýy tıis. Ereje – osy. Qazir Búldirshinder mektebi jumys istep tur. Bul – 1 synypqa qabyldanatyn balalarǵa arnalǵan oqý kýrsy. Bári Ulttyq bilim berý derekteri qorynda tirkeýli tur. JSN tirgen kezde balanyń qaıda, qaı bilim ordasynda tárbıelengeni kórinip tur. Balabaqshada tárbıelense, ony qaıta mektepaldy daıarlyqqa qabyldaý múmkin emes. Sebebi júıe bir tirkelgendi ekinshi ret qabyldamaıdy, - dedi Aqtóbe oblystyq bilim basqarmasynyń bólim basshysy Gúljan Qulybekova.
Eger bala qyrkúıek-jeltoqsan aılary aralyǵynda 6 jasqa tolsa, ata-analardyń keler jyldy kútýine quqyǵy bar.
– Boıy alasa, áljýaz balalar da bolady. Soǵan qarap ata-analar oılanyp, mektepke bergisi kelmeıdi. Ondaıda mektepaldy daıarlyq synybyn suraıdy. «Balam daıyn emes, mektep baǵdarlamasyn qalaı ıgeredi» dep ýaıymdaıdy kóbi. Álippeni qolyna endi ustaıtyn balanyń mektepke bárin bilip barýy mindetti emes. Ol mektepte júrip úırenedi. Al eger 1 synypty bitirgende de oqý baǵdarlamasyn ıgere almasa, ata-ana ótinishimen 1 synypty qaıta oqı alady. Sonymen birge psıhologııalyq-medıtsınalyq-pedagogıkalyq komıssııa qorytyndysyn alady. Al eger 6 jastaǵy nemese 6 jasqa endi tolatyn balanyń 7 jastan bastap mektepke beretin bolsa, 1 jyl úıde kútýine týra keledi, - dedi Gúljan Qulybekova.
Aıta keteıik, mektepaldy daıarlyq toby kún saıyn 2 saǵat, al 1 synyp oqýshylary 4 saǵat oqıdy. Aqtóbe oblystyq bilim basqarmasynyń bólim basshysy Gúljan Qulybekovanyń aıtýynsha, 6 jastaǵy balalar bul júktemeni kótere alady.
Búgin Oqý-aǵartý mınıstrligi orta bilim berý uıymdarynda 2025–2026 oqý jylynyń bastalý jáne aıaqtalý merzimderin, sondaı-aq kanıkýl kezeńderin naqtylady. Oqý protsesi 2025 jylǵy 2 qyrkúıekte bastalyp, 2026 jylǵy 25 mamyrda aıaqtalady.