6 jasqa tolǵan jetkinshekter balabaqshadan shyǵarylmaıdy - mınıstr

ASTANA. QazAqparat – 6 jasqa tolǵan jetkinshekter balabaqshadan shyǵarylmaıdy. Olar oqý protsesi tolyq aıaqtalǵanǵa deıin mektepke deıingi uıymda tárbıe alady. Bul týraly QR Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Mektepke deıingi uıymda bala 6 jasqa tolǵan kúnnen bastap qarjylandyrýdyń toqtatylýy, jetkinshekterdi mektepke deıingi uıymnan jáne memlekettik bilim berý tapsyrysynan shyǵarýǵa vedomstvonyń normatıvtik-quqyqtyq aktilerinde ondaı zańnamalyq negiz joq ekenin habarlaımyz» delingen A. Aımaǵambetovtiń Májilis depýtattarynyń saýalyna bergen jaýabynda.

Onyń aıtýynsha, balabaqshadaǵy tárbıe men oqytý salasyndaǵy qyzmet naqty rettelgen.

Balalar kontıngentin memlekettik tapsyryspen qamtamasyz etý jáne zańnama talaptaryn saqtaý máselesi bıyl aqpan, tamyz aılarynda ótkizgen keńesterde qaraldy.

Bilim berý qyzmetin kórsetý jáne mektep jasyna deıingi balalardy tárbıemen jáne oqytýmen qamtý bóliginde naqty tapsyrmalar men usynymdar berildi.

«Jergilikti atqarýshy organdar nemese balabaqshalar jaǵynan mektepke deıingi tárbıemen jáne oqytýmen qamtý nemese qarjylandyrý bóliginde zańnama normalarynyń buzylǵanyn rastaıtyn faktiler bolǵan jaǵdaıda, Mınıstrlikke habarlaýdy suraımyz. Balalar quqyqtaryn buzý jáne olardy mektepke deıingi uıymdardan shyǵarý jónindegi depýtattyq saýal úshin negiz bolǵan faktiler anyqtalǵanda, Mınıstrlik qatań sharalar qabyldaýǵa ári balanyń bilim alý quqyǵyn qalpyna keltirýge daıyn», - dep jazdy mınıstr.