6 jasar skeıdborshy úsh qyz ǵalamtor juldyzdaryna aınaldy
ASTANA. QazAqparat - Ońtústik Kalıfornııada turatyn 6 jasar úsh búldirshin qyz ózderin Pink Helmet Posse (alqyzyl dýlyǵaly jasaq) dep ataıdy. Qyzdar tipti eresek sportshylardy tań qaldyratyn qıyn áreketterdi oryndaıdy.
Relts Merfı, Sıerra Kerr men Bella Kenvortı bos ýaqyttarynda qýyrshaqpen de, basqa da qyz balalar tárizdi oıyndarmen de oınamaıdy. Úsh qurby skeıtbordpen tek ul balalar ǵana aınalyspaıtynyn dáleldeımiz dep sheshken. Ózderiniń jattyǵýlarynyń beınematerıaldary men fotosýretterin qyzdar áleýmettik jelilerindegi paraqshalar men resmı saıtyna júktep otyrady. «Olar adam sengisiz áreketterdi oryndaıdy!», - deıdi Transworld Skateboarding jýrnalynyń redaktory Djeımı Oýens, - Men skeıtbordıngpen aınalysatyn jasóspirim qyzdardy kórdim, biraq mynandaı kishkentaı qyzdardy birinshi ret kórýim». Ata-analary alǵashynda qyzdarynyń elikteýshilikterin kórgen kezde shoshyp ketken, alaıda bul is shynymen olardyń qoldarynan keletinin kórgennen keıin, barynsha kómektesip, qoldaý bildire bastaǵan. «Qyzym tórt metrlik qabyrǵany baǵyndyrǵan kezde, men ony maqtan tutamyn. Men onyń ózine jáne kúsh-jigerine degen senimdiliginiń artyp kele jatqanyn baıqap kelemin. Ol oǵan eseıgende asa qajet bolady», - deıdi Reltstiń ákesi. Qazir bul úshtik jergilikti jerde tanymal bolyp alǵan. Kishkentaı qyzdar bir emes, birneshe ret suhbat berip, telearnalardan kórsetilgen.
