6 jasar oraldyq fýtbolshy álem nazaryn ózine aýdardy
ASTANA. KAZINFORM – 6 jasar oraldyq bala erekshe qabiletimen álemniń nazaryn aýdardy. Ol ózinen birneshe jas úlken balalarmen fýtbol oınap, olardyń arasynda úzdik atanyp júr.
Al jas darynnyń ákesi Meırambek Rahmatýllın balasynyń erekshe oıynyn áleýmettik jelige jarııalap, mıllıondaǵan qaralym jınaǵan.
– Ulym aıaǵyn basqannan beri ózinen úsh jas úlken aǵasy Aıtóremen birge dop oınap ósti. Talantyn menen buryn aýladaǵy úlken balalar baıqaǵan. «Balańyz fýtboldy myqty oınaıdy» degen sózdi jıi estigen soń, ony fýtbolǵa alyp bardym, - deıdi ol «Jibek Joly» arnasynyń «Búgin LIVE» baǵdarlamasyna bergen suhbatynda.
Áleýmettik jeliniń juldyzyna aınalǵan Aısultan Ǵadilbek 4 jasynan bastap fýtbolmen shuǵyldanady eken.
– Tórt jasynda Baby Football sektsııasyna apardyq. Alǵashqy oıynnyń ózinde jattyqtyrýshylar onyń qabiletin ańǵardy. Keıin bapkerler «bul balany jaqsylap jattyqtyryp, baqylaý kerek» degen usynys aıtty. Solardyń keńesimen oıyndaryn beınetaspaǵa túsire bastadym. Sebebi ár matchtan keıin jattyqtyrýshylar vıdeony qarap, kemshilikterin taldaıdy, - deıdi jas talanttyń ákesi.
Meırambek Rahmatýllın áýelgide Aısultannyń fýtbol oınaǵan kadrlary áleýmettik jeli úshin túsirilmegenin aıtady. Alaıda beınejazbalar álemniń nazaryn aýdardy.
– Bastapqyda vıdeolardy tek jattyqtyrýshylardyń taldaýy úshin túsirdik. Keıin sol jazbalardyń úzindilerin ózimniń WhatsApp-taǵy jáne basqa da áleýmettik jelilerdegi statýstaryma sala bastadym. Negizgi maqsatym – týǵan-týystarymyz kórip, Aısultandy maqtasa, balaǵa ynta-jiger beredi degen oı boldy. Shynyn aıtsam, vıdeolar mıllıondaǵan qaralym jınap, álemge taralady dep oılaǵan joqpyn. Ýaqyt óte kele ol túrli akademııalardyń nazaryna ilige bastady. Sol sebepti bul baǵytty ary qaraı jalǵastyrýdy jón kórdik. Endigi maqsat – iri skaýttardyń kózine túsý, - deıdi ol.
Stýdııa qonaǵy balasyn akademııaǵa berýdi josparlap otyr.
– Qazir balamyzdy akademııaǵa berý de josparymyzda bar. Bes jasynan bastap birneshe otandyq akademııa habarlasty. «Balany alyp kelińiz, shyǵyndaryn kóteremiz, grant bólemiz» degen usynystar túsip jatyr. Onyń ishinde otandyq iri klýbtar da bar. Ázirge eshqaısysymen naqty kelisim jasalǵan joq. Balam altyǵa endi ǵana toldy. Áli kishkentaı bolǵandyqtan, ortasyn ózgertpeı tura turǵandy jón kórdik. Qazir baryp júrgen sektsııasynda da jaqsy jattyǵyp júr. Akademııalar negizinen alty jastan qabyldaımyz deıdi. Biraq keıbiri «oıynyna qaraı bes jastan bastap oıyndarǵa tarta beremiz» dep shaqyrdy, - deıdi Aısultannyń ákesi.
Oraldyq daryn kelesi oqý jylynan bastap aty shýly akademııalarda kásibı bilim alýy múmkin.
– Aısultan qazirgi sektsııasynda ózinen bir-eki jas úlken balalarmen oınaıdy. Sebebi ózimen qatar komanda joq. Onyń ústine bul jastaǵy balalar arasynda jarystar da uıymdastyrylmaıdy. Qazir mektepaldy daıarlyq synybynda oqyp jatyr. 1-synypqa deıin akademııalardyń usynystary boıynsha naqty sheshim shyǵarý kerek. Olardyń bárine baryp kóremiz. Qaı usynys tıimdi, múmkin sheteldik akademııalar shaqyryp qalar. Biraq qoldan kelgendi aıamaı, barlyq múmkindikti jasaımyz, - deıdi Meırambek Rahmatýllın.
Al Aısultannyń ózi «Qaırat» fýtbol klýbynda oınaǵysy keledi eken.
– Maǵan «Qaırat», «Real Madrıd», «Barselona» men «Atletıko Madrıd» unaıdy. «Qaırat» fýtbol klýbynda oınaǵym keledi. Oıynshylardan Dastan Sátbaev unaıdy. Armanym – álem kýbogyn utý, - deıdi daryndy bala.
Aıta keteıik, «Ordabasy» fýtbol klýbynyń jańa prezıdenti taǵaıyndaldy.