6 jasar Lıza Pylaevanyń ólimi: Joǵarǵy sot aqtaý úkimin kúshinde qaldyrdy
ALMATY. KAZINFORM – Joǵarǵy sot kámeletke tolmaǵan Lıza Pylaevanyń ólimine qatysty is boıynsha qylmystyq isti qarady.
Apellıatsııalyq satynyń ózgerissiz qaldyrǵan sot úkimimen Elızaveta Pylaevanyń naǵashy tátesi Olga Shmakova, naǵashy ájesi Leonarda Ryjakova jáne baǵban Ýktab Mahmýdov kinásiz dep tanylyp, olardyń áreketinde qylmystyq quqyqbuzýshylyq quramynyń bolmaýyna baılanysty aqtalǵan.
Sot alqasy isti zerdelep, mynadaı qorytyndyǵa keldi.
Tergeý barysynda anyqtalǵandaı, 2019 jyldyń 12 mamyrynda saǵat 15:30 shamasynda Shmakova óz úıiniń aýlasynda qyzǵanyshtan aýlaǵa júgirip shyqqan kámeletke tolmaǵan jıeni P.-ny kóligimen basyp ketken.
Úıde baǵban bolyp jumys istegen M. úı ıeleriniń nusqaýymen P.-ny jýyp, basqa kıimge aýystyryp, jazataıym oqıǵany elestetip denesine músin ornatqan. Odan keıin saǵat 21:05-te jábirlenýshiniń atasy men anasy ony aýrýhanaǵa ákelip, ol óldi dep tanylǵan.
Bul fakti boıynsha kámeletke tolmaǵan balanyń ájesi R. men otbasynyń baǵbany M. jábirlenýshiniń ústine músinniń qulaǵanyn kórsetip, kórineý jalǵan kýálik bergen.
– Qylmystyq protsestik kodeksiniń 19-babynda kózdelgen kinásizdik prezýmptsııasyna sáıkes, aıyptaý úkimi boljamǵa negizdelýi múmkin emes jáne jetkilikti jol beriletin jáne senimdi dáleldemelerdiń jıyntyǵymen bekitilýge tıis,– delingen Joǵary sot habarlamasynda.
Tergeý organdary jábirlenýshiniń óliminiń mán-jaıyn anyqtaǵan joq. Buǵan is boıynsha júrgizilgen saraptamalardyń qarama-qaıshy qorytyndylary dálel.
– Bes saraptama kóliktiń jábirlenýshini qaǵyp ketkenin joqqa shyǵarady. Jeke sarapshy júrgizgen bireýi ǵana dene jaraqatyn joqqa shyǵarmaıdy, biraq ol kóliktiń aldynda otyrǵan jaǵdaıda ǵana, bul taǵylǵan aıypqa qaıshy keledi. Tekserilgen kólikte jol-kólik oqıǵasynyń nemese jábirlenýshimen basqa da janasýdyń izderi tabylǵan joq.Qyzǵanyshtan kisi óltirý ýáji eshbir obektıvti dáleldermen rastalmaıdy jáne kýálardyń aıǵaqtarymen jáne fotomaterıaldarmen joqqa shyǵarylady,– delingen habarlamada.
Anonımdi kýá buryn qylmystyq jaýapkershilikke tartylyp, tergeý kezinde qaıtys boldy. Tıisinshe, odan jaýap alyp, bergen aıǵaqtarynyń rastyǵyn tekserý múmkin emes edi. Jábirlenýshiniń denesinde janýarlardyń tistegen izderi balanyń eresekterdiń qaraýynsyz qalǵanyn kórsetedi jáne jábirlenýshini qasaqana urý nusqasyn joqqa shyǵarady.
Osylaısha, tergeý organdary jábirlenýshiniń ólimine kóliktiń ony qaǵyp ketýinen jáne sottalýshynyń ony basyp ótkeni týraly dálelder keltirgen joq. Sh.-nyń kinási anyqtalmaǵandyqtan, R. men M-niń áreketterinde de qylmys belgileri joq.
Joǵaryda aıtylǵandardyń negizinde Joǵarǵy Sottyń sot alqasy sottyń aqtaý úkimin ózgerissiz qaldyrdy.
Osyǵan deıin Almatynyń Naýryzbaı aýdandyq qylmystyq ister jónindegi mamandandyrylǵan aýdanaralyq soty 6 jasar qyzdyń ólimine qatysty isti qarap, aıyptalýshylardyń bárin aqtap shyǵarǵan bolatyn.
Eske sala keteıik, Elızaveta Pylaeva 2019 jyldyń 12 mamyry kúni belgisiz jaǵdaıda qaıtys bolǵany týraly jazǵanbyz.