6 jasar balany ólimnen qutqarǵandar marapattaldy
2 shilde kúni keshqurym oqys oqıǵaǵa kýá bolǵan azamattar sýǵa kete jazdaǵan balany ólimnen qutqaryp alǵan bolatyn. Vladımır Bekker oqys oqıǵa kezinde erlik tanytqandarǵa, sonymen birge Angelına men Tımýrdyń ata-analaryna alǵysyn aıtty.
«Dál sol kúni saǵat shamamen 21:00 kezinde 17 jastaǵy ekinshi kýrstyń stýdenti Angelına Dármenbaeva sińilisimen birge Aqbulaq aýdanynyń mańyndaǵy jaǵalaýda - «Qazaqstan» sport keshenine jaqyn jerdegi balalar alańynda qydyryp júrgen. Onyń janynda samokat tepken jas balalar bar edi. Sol sátterdiń birinde ata-anasynyń nazarynan tys qalǵan 6 jasar ul bala ózen men jaǵanyń arasyndaǵy qorshaýdan qarǵyp ótip, sýǵa túsip ketken», - delingen habarlamada.
Júzýdi bilmeıtin jas bala sýǵa tunshyǵa bastaıdy. Kómek surap aıqaılaǵan balany baıqaǵan Angelına sýǵa qaraı júgirgen.
«Jyldam sýǵa túsken Angelına balany shap berip, sýǵa ketý qaýpinen aman alyp qalady. Osydan keıin kómekke kelgen basqa da jas jigitter 6 jasar balany sýdan alyp shyqqan. Onyń erlikke para-par áreketi men jyldam qımylynyń arqasynda jas bala aman qaldy», - delingen komıtettiń habarlamasynda.
Angelınamen birge balany sýdan alyp shyqqan jigit - 19 jastaǵy stýdent Tımýr Nasıbýllın bolyp shyqty. Ol ótip bara sýda balany qutqarýǵa árekettenip jatqan Angelınany kórip, sýǵa túsip balany jaǵaǵa alyp shyqqan. Olarmen birge Arman Smaǵulov atty taǵy bir jigit balany jaǵaǵa jetkizýge kómektesken.
Eske sala ketsek, budan bes kún buryn Astana turǵyny Esil ózenine batyp bara jatqan balanyń ómirin saqtap qalǵany týraly habarlaǵan bolatynbyz. Sol kezde TJ boıynsha komıtet balany sýdan qutqarǵan azamatty izdestirip jatqan edi.