6 shilde. Týǵan kún ıeleri
ESІMDER
79 jyl buryn (1940) Qazaqstan Respýblıkasynyń Tuńǵysh Prezıdenti - Elbasy Nursultan Ábishuly NAZARBAEV dúnıege keldi.
Nursultan Nazarbaev 1940 jylǵy 6 shildede Almaty oblysy, Qaskeleń aýdany, Shamalǵan aýylynda dúnıege kelgen. 1967 jyly Qaraǵandy metallýrgııa kombınaty janyndaǵy joǵary tehnıkalyq oqý ornyn bitirdi.
Ekonomıka ǵylymdarynyń doktory, Qazaqstan Respýblıkasy Ulttyq ǵylym akademııasynyń, Halyqaralyq ınjenerlik akademııanyń, Reseı Federatsııasy áleýmettik ǵylymdar akademııasynyń akademıgi, Ál-Farabı atyndaǵy Qazaq memlekettik ulttyq ýnıversıtetiniń qurmetti professory, Belarýs ǵylym akademııasynyń qurmetti múshesi, M.V.Lomonosov atyndaǵy Máskeý memlekettik ýnıversıtetiniń qurmetti professory.
1960-1969 jyldary Qaraǵandy metallýrgııa zaýytynda jumys istedi.
1969-1973 jyldary Qaraǵandy oblysy Temirtaý qalasyndaǵy partııa-komsomol jumystarynda jaýapty qyzmetter atqardy.
1973-1977 jyldary - Qaraǵandy metallýrgııa kombınatynyń partkom hatshysy.
1977-1979 jyldary - Qaraǵandy oblystyq partııa komıtetiniń hatshysy, 2-hatshysy.
1979-1984 jyldary - Qazaqstan KP Ortalyq Komıtetiniń hatshysy.
1984-1989 jyldary - Qazaq KSR Mınıstrler Keńesiniń tóraǵasy.
1989-1991 jyldary - Qazaqstan KP OK birinshi hatshysy, 1990 jylǵy aqpan-sáýir aralyǵynda Qazaq KSR Joǵary Keńesiniń tóraǵasy.
1990 jyldyń sáýirinen - Qazaqstan Respýblıkasynyń Prezıdenti.
1991 jyldyń 1 jeltoqsanynda tuńǵysh ret Qazaqstan Prezıdentiniń jalpyhalyqtyq saılaýy ótti. Saılaý nátıjesinde Nursultan Ábishuly Nazarbaev basym daýyspen (98,7 protsent) jeńiske jetti.
1995 jyldyń 29 sáýirinde jalpyhalyqtyq referendým nátıjesinde Qazaqstan Respýblıkasy Prezıdenti N.Á.Nazarbaevtyń ókilettigi 2000 jylǵa deıin uzartyldy.
1999 jyldyń 10 qańtarynda ótken balamaly saılaýdyń nátıjesinde N. Nazarbaev 79,78 protsent daýys alyp, Qazaqstan Respýblıkasy Prezıdenti bolyp qaıta saılandy.
2005 jyldyń 4 jeltoqsanynda saılaýshylardyń 91,5 protsent daýysyn alyp, Qazaqstan Respýblıkasynyń Prezıdenti bolyp qaıta saılandy.
2010 jyldyń 14 maýsymynda «Qazaqstan Respýblıkasynyń keıbir konstıtýtsııalyq zańdaryna Qazaqstan Respýblıkasy Tuńǵysh Prezıdentiniń - Elbasynyń qyzmetin qamtamasyz etý salasynda zańnamany jetildirý máseleleri boıynsha ózgerister men tolyqtyrýlar engizý týraly» № 298-ІV Qazaqstan Respýblıkasynyń Konstıtýtsııalyq Zańy kúshine endi.
2011 jyldyń 3 sáýirinde saılaýshylardyń 95,5 protsent daýysyn alyp, Qazaqstan Respýblıkasynyń Prezıdenti bolyp qaıta saılandy.
2015 jylǵy 26 sáýirde ótken saılaýda jeńiske jetip, saılaýshylar daýysynyń 97,75 protsentine ıe boldy.
Nursultan Nazarbaev - Qazaqstan Respýblıkasy Qaýipsizdik Keńesiniń tóraǵasy.
2019 jyly 19 naýryzda Qazaqstan halqyna arnaǵan úndeýinde óziniń otstavkasy týraly jarııalady.