6 shilde kúni «Qazaqstan» RTRK sazger R. Gaısınniń «Astana - maqtanyshym» týyndysynyń mýzykalyq kórsetilimin usynady (FOTO)
ASTANA. QazAqparat - 6 shilde kúni «Qazaqstan» RTRK sazger Renat Gaısınniń «Astana - maqtanyshym» týyndysynyń mýzykalyq kórsetilimin usynady. Respýblıkalyq teleradıokorporatsııanyń jáne jas sazgerdiń ortaq týyndysy Astana kúnine arnalady.
«Mýzyka jannyń baqylanbaıtyn jáne asaý jalynynan týyndaıdy. Kenetten týyndaǵan shyǵarma erekshe bir áýezdilikke ulasady. «Astana -maqtanyshym» týyndysynyń mýzykalyq nysany qysqa merzim ishinde týyndaǵan shyǵarma. Sebebi meniń ishki álemimde Astana burynnan nota bolyp jazylǵan edi. Mysaly, men Astanadan jyraqta bolǵan kezde oǵan degen saǵynyshym, muńym mınorlyq kúıde bolatyn. Al osy qalada bolǵan ómirimdegi eń keremet sátter, jarqyn oqıǵalar majorlyq kúıdegi kóńil kúı», - deıdi sazger R. Gaısın.
Názik áýezdi «Astana - maqtanyshym» týyndysy fortepıano men garmon tilinde ózen aǵysyn, keń dalanyń aýasy men túngi tynyshtyǵyn sıpattaıdy. Atalǵan týyndyǵa beınebaıan túsirilip qana qoımaı, montajy da aıaqtaldy. Osy beınebaıannyń tusaýkeseri 6 shilde kúni «Qazaqstan» telearnasynan kórsetiledi.
«Biz Astanany áli eshkim kórmegen qyrynan kórsetýge tyrystyq, - dep eske túsiredi beınebaıan prodıýseri Jeńis Tumataev. - Sondyqtan da qala ǵımarattaryn ústinen túsirýge múmkindik bergen kvadrokopterdi paıdalandyq. Sondaı-aq, qala turǵyndarynyń tańdaıyn qaqqyzǵan bir sát: úlken roıaldi serýendeıtin katerge ornalastyrdyq. Kesh boıy Esildiń sánin aq keme, aq kemege ornatylǵan aq roıal jáne aq kostıým kıgen mýzykant kirgizdi. Esildiń jaǵasy sýretke túsirip turǵan qala turǵyndaryna toly boldy».
Renat Gaısınniń «Astana - maqtanyshym» atty tórt mınýttyq kompozıtsııasy «Qazaqstan» Korporatsııasynyń ótken jyldardaǵy Astana kúnine tartqan syılyqtarymen salystyrýǵa da kelmeıdi. Esterińizge sala keteıik, mundaı dástúr úsh jyl buryn bastaý alǵan edi. 2013 jyly Astana kúnine oraı Aıman Musahodjaeva «Jeke oryndaýshylar akademııasy» Memlekettik kameralyq orkestirimen jáne «Aıgólek» skrıpkashy balalar ansamblimen birlese otyryp, aspapty týyndyny syıǵa tartqan edi. Ótken jyly «Qazaqstan» RTRK halyq shyǵarmashylyǵynyń ansambli oryndaǵan túrli mýzyka men bı baǵyttaryn jınaqtaǵan arnaıy beınebaıan usynǵan bolatyn.
