6 ret sátsizdikten keıin sheteldik otbasy Qazaqstanda EKU arqyly balaly boldy
ALMATY. QazAqparat - Almaty reprodýktologııalyq emhanasynda sheteldik jup EKU arqyly sábıli boldy, dep habarlaıdy QazAqparat tilshisi.
Qazaqstandyq dárigerlerdiń kómegimen EKU dúnıege kelgen balalar álemniń 50 elinde ómir súrip jatyr. Óıtkeni, medıtsınalyq týrızmniń damýyna eldegi arzan qyzmetter serpin bolyp otyr.
Qazaqstan Reprodýktıvti medıtsına qaýymdastyǵynyń tóraǵasy Vıacheslav Lokshın Qazaqstanda bolǵan erekshe oqıǵa týraly aıtyp berdi.
Onyń aıtýynsha, byltyr sheteldik otbasy qazaqstandyq reprodýktologtardyń kómegimen perzent súıgen.
Aýstralııalyq óziniń Ońtústikkoreıalyq jarymen týǵan jerinde birneshe ret EKU arqyly sábıli bolýǵa tyrysqan. Alaıda bul em-shara sátsiz boldy.
«Bizdiń dárigerler aǵylshyn tilinde jaqsy sóıleıdi. Sondyqtan álemdegi barlyq reprodýktologııa salasyndaǵy jańalyqtar bizdiń elde belsendi qoldanylyp otyr. Onyń ishinde embrıondy 46 hromosomaǵa tekserý de múmkin bolyp otyr. Qazaqstan medıtsınalyq týrızm ortalyǵyna aınaldy. Adamdar bizge tek medıtsınalyq qyzmettiń arzandyǵy úshin ǵana emes, dárigerlerdiń biliktiligi úshin de keledi», - dedi Vıacheslav Lokshın.
Máselen myna jup 5 jyl buryn otasqan. Alǵashqy 3 jylda dárigerlerge qaralmaǵan.
Odan keıin Ońtústik Koreıa mamandaryna qarala bastaǵan. Qazaqstandyq reprodýktologtyń aıtýynsha, olardyń sábı súıý múmkindigi óte tómen bolǵan.
Ekeýi de 40-tan asqan analyq atalyq jumyrtqalardyń sany shekteýli, uryqtyń sapasy da joǵary bolmaǵan.
Ońtústik Koreıadaǵy reprodýktologtar tek 3 analyq jasýsha alǵan. Al Qazaqstan mamandary 5 analyq jasýsha aldy. Osydan-aq, bul jup qazaqstandyq medıtsınaǵa qaralýǵa túpkilikti bekingen.
«Alaıda birinshi baǵdarlama sátsiz aıaqtaldy. Áıeldiń jasy 41-ge ketip bara jatqan soń, biz donordyń analyq jasýshasyn alýdy usyndyq. Biraq, otbasy buǵan kelispedi. Keıin olar saqtandyrý polısi arqyly Aýstralııaǵa baryp jasap kórdi. Alaıda ol jaqta dárigerler 1 aq analyq jumyrtqa ala aldy. Ol da sátsiz boldy. 4 aıdan soń patsıentter qaıta oraldy. Qaıtadan baǵdarlamany bastaǵan soń analyq uryqty qursaqqa qondyrýǵa kiristik. Kópten kútken júktilik paıda boldy. Alaıda áıel bastan aıaq bosanǵansha akýsherdiń baqylaýynda boldy. 8,5 aıdan soń otbasynda deni saý qyz bala dúnıege keldi. Baqytty otbasy shetelge ketti. Bizben baılanysty úzgen joq, balasynyń jaǵdaıy týraly únemi habarlap turady», - dedi V.Lokshın.
