6 paıyzben 20 mln teńgege deıin – Smaıylov kásipkerlerge beriletin nesıe jaıly
NUR-SULTAN. QazAqparat – Úkimet basshysynyń orynbasary Álıhan Smaıylov «Bıznestiń jol kartasy 2025» baǵdarlamasy sheńberinde kásipkerlerge qandaı sharttar boıynsha jeńildetilgen nesıe beriletinin aıtyp berdi, dep habarlaıdy QazAqparat tilshisi.
«Qazirgi jaǵdaıda bıznesti qoldaý úshin Memleket basshysynyń tapsyrmasyna sáıkes Úkimet birqatar qoldaý sharasyn qabyldady. Ekonomıkanyń ósimin qamtamasyz etý úshin 2020 jyldyń aıaǵyna deıin keshendi jospar iske asyryla bastady. Ótken aptada Parlament Senaty bıznes-klımatty jaqsartý jónindegi zańnamalyq bastamalardyń kezekti segizinshi paketin qabyldady. Sonymen birge óńirlerdegi bıznes ókilderimen kezdesý sheńberinde qosymsha sheshýdi talap etetin máseleler qaraldy», - dedi Álıhan Smaıylov Úkimet otyrysynda.
Onyń sózinshe, bul máseleler salyqtyq ákimshilendirýge, nesıeler boıynsha qarjy júktemesin tómendetýge, ishki naryqty keńeıtýge, jeńildetilgen nesıe berýge jáne basqa da suraqtardy qamtıdy.
«Osy suraqtardy júıeleý boıynsha bıznesti qoldaý úshin qosymsha sharalar paketi birneshe ret talqylanyp, daıyndaldy. Erekshe atap óterlik jaǵdaı – osy jyldyń shilde aıynda mıkro jáne shaǵyn kásipkerlik sýbektilerin qoldaý boıynsha «Bıznestiń jol kartasy 2025» baǵdarlamasy sheńberinde jańa baǵyt iske qosylady. Nesıeler ekinshi deńgeıli bankterdiń jáne mıkroqarjylyq uıymdardyń qarajaty esebinen beriledi. Operator – «Damý» qory. Nesıeler aınalym qarajatty tolyqtyrý jáne ınvestıtsııalyq maqsatta 5 mıllıon jáne 20 mıllıon teńgege deıin beriletin bolady. Sońǵy stavkasy – 6 paıyz. Negizgi qaryz mólsherine 80 paıyzǵa deıin memleket tarapynan kepildik beriletin bolady», - dedi ol.
