6 óńirde tasqyn qaýpi seıilip keledi
ASTANA. KAZINFORM – Tótenshe jaǵdaılar vıtse-mınıstri Baýyrjan Syzdyqov Úkimet otyrysynda tasqyn qursaýyndaǵy óńirlerdiń ahýalyn baıandady.
«Qazirgi tańda Atyraý, Batys, Soltústik Qazaqstan oblystarynda sý tasqynyn joıý jumystary jalǵasyp jatyr. Reseıdiń Irıkla sý qoımasynan Jaıyq ózenine aǵyzǵan sýdyń saldarynan batysta jaǵdaı kúrdelene tústi, al soltústikte sý Aqmola oblysynan kelip jatyr. Abaı, Pavlodar, Qaraǵandy, Ulytaý, Aqmola jáne Qostanaı oblystarynda jaǵdaı turaqty, jergilikti ózenderdegi sý deńgeıi birtindep tómendeýde. Bul óńirlerdegi eldi mekenderdi sý basý qaýpi joq», - dedi ol.
Vıtse-mınıstrdiń sózinshe, qazir 5 myńnan astam turǵyn úı, 16 myńnan astam saıajaı, 1000 aýla men 91 ǵımarat sý astynda qalyp otyr.
«10 oblysta jergilikti aýqymdaǵy 41 tótenshe jaǵdaı jarııalandy. Abaı jáne Pavlodar oblystarynyń 3 aýdanynda tótenshe ajǵdaı rejımi alyndy. Zardap shekken eldi mekenderge sý jetkizý, energııamen jabdyqtaý jáne kólik qatynasyn qalpyna keltirý máseleleri mınıstrliktiń úılestirýimen jedel sheshimin tappaq. Sý tasqynyn joıý jumystary bastalǵannan beri shamamen 11,6 mıllıon tekshe metr sý sorylyp, 5 mıllıonnan astam qum qapshyq tóseldi», - dedi Baýyrjan Syzdyqov.
