6 óńirde 4 myńǵa jýyq úı sý astynda qalyp otyr

ASTANA. KAZINFORM – 6 óńirde 4 myńǵa jýyq úı sý astynda qalyp otyr. Bul týraly TJM azamattyq qorǵanys jáne áskerı bólimder komıtetiniń aǵa ofıtseri Erasyl Saıpash aıtty.

«Sý tasqyny bastalǵaly beri 102 328 adam, onyń ishinde 37 537 bala qaýipsiz jerlerge jetkizildi. Ýaqytsha ornalasý pýnkterine 6 757 adam, onyń ishinde 3 148 bala ornalasty. 10 120 adam úılerine oraldy. 9,1 mln astam tekshe metr erigen qar sýy soryp shyǵaryldy. 1,7 mln qapshyq jáne 1,2 mln tonna ınertti materıal tóseldi. Búgingi tańda avarııalyq-qutqarý jumystarynda 35 551 adam, 3 559 tehnıka, 750 sý sorý quraly, 214 júzý quraly, 14 áýe kemesi jumyldyryldy», - dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, osy saǵatta Aqtóbe, Qostanaı, Aqmola, Atyraý, Soltústik Qazaqstan, Shyǵys Qazaqstan oblystarynda 3 957 jeke turǵyn úı, 942 aýla aýmaǵy jáne 962 saıajaı úıleri sý astynda qalǵan. 3 129 turǵyn úı men 2 033 aýla aýmaǵynan sý buryldy.

«Elimizdiń 8 óńirinde Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 36 TJ áreket etedi. TJM azamattardy asa muqııat bolýǵa, sý tasqyny kezeńinde qaýipsizdik sharalaryn múltiksiz saqtaýǵa, úılerden jáne evakýatsııalaý pýnktterinen tıisti ruqsatsyz ketpeýge shaqyrady», - dedi Erasyl Saıpash.