6 Olımpıada chempıony qatysqan «Gran-Prı» týrnırinde qazaqstandyqtar júldeden qur qaldy
ASTANA. QazAqparat - Ótken juma, senbi, jeksenbi kúnderi elimizde tuńǵysh ret taekvondodan álemdik «Gran-Prı» týrnıri ótti. Elorda tórindegi «Dáýlet» sport kesheninde ótken alamanda 50 eldiń 200-ge jýyq sportshylary baq synady.
Qazaqstan namysyn 9 sportshy qorǵady. Ókinishke qaraı jerlesterimizdiń barlyǵy jeńis tuǵyryna kóterile almady.
Birden aıta keteıik, atalmysh dodada Olımpıada oıyndarynyń 6 chempıony baq synady.
Qysqasha toqtalyp ótsek, erler arasyndaǵy qazirgi Olımpıada chempıondary Hoel Gonsales (Ispanııa), Servet Tazegıýl (Túrkııa), Sebastıan Krısmanıch (Argentına), Karlo Molfetta (Italııa) básekeniń kórigin qyzdyrdy. Olardyń arasynda sondaı-aq 2000 jáne 2004 jylǵy Olımpıada jeńimpazy amerıkandyq Stıven Lopes te bar. Al áıelder arasynan eki dúrkin álem chempıony jáne eki dúrkin Olımpıada chempıony qytaılyq Ý Tszınıýı (2008, 2012) óner kórsetti.
Sondaı-aq Astana turǵyndary Aaron Kýk (Anglııa, úsh dúrkin álem chempıony), Daba Modıbo Keıta (Malı, eki dúrkin álem chempıony), Albert Gaýn (Reseı, álem chempıony), Sharlot Roýz Kreıg (AQSh, álem chempıony men Olımpıada oıyndarynyń júldegeri), Nur Tatar (Túrkııa, London Olımpıadasynyń kúmis júldegeri), Muhammad Bahcherı (Iran, London Olımpıadasynyń kúmis júldegeri), Alekseı Denısenko (Reseı, Olımpıada oıyndarynyń qola júldegeri) syndy aty álemge áıgili sportshylardyń ónerin tamashalady.
«Gran-Prı» dodasynyń alǵashqy kúninde-aq, otandastarymyzdyń jol y bolmady. Tórt birdeı taekvondo shymyz qarsylastaryna ese jiberdi. Bul kúni eń úzdik nátıjeni 49 kelide Farıza Aldońǵarova kórsetti. Birinshi kezdesýinde frantsýz Hajer Mustafadan basym túsip, ekinshi saıysynda álemdik reıtıngtegi ekinshi orynda turǵan horvat Lýsı Zanınovıchten utylyp qaldy.
67 kelide baq synaǵan eki birdeı taekvondoshymyzdyń da joly bolmady. Quramanyń kóshbasshysy Ferýza Ergeshova men Mereke Júnisova alǵashqy aınalymda jeńilis tapty. 80 kelide óner kórsetken Smaıyl Dúısebaı da birinshi aınalymnan ári asa almady.
Al jarystyń ekinshi kúni jergilikti jankúıerler jerlesterimizden zor úmit kútken bolatyn. Sebebi, talaı álemdik básekelerde qanjyǵasy maılanyp júrgen 58 kelide óner kórsetetin Nursultan Mamaevqa bapkerleri de, jankúıerleri de sengen edi. Biraq, otandasymyz birinshi kezdesýinde taılandtyq Penek Karaketten aılasyn asyra almady.
80 kelide Maqsat Ábdirambek te ózbekstandyq Maksım Rafalovıchten utylyp qaldy. Áıelder arasynda 67 kelidegi Gúlim Bıbalaeva qytaılyq ıÝn Feı Gýden aılasyn asyra almady.
Jarystyń sońǵy kúni baq synaǵan Ásel Qoılybaı men Qaırat Sarymsaqov ta júldeden qol úzdi. Ásel birinshi aınalymda horvat qyzy Martın Zýbchıchke jol berse, Qaırat birinshi aınalymdy jeńispen bastaǵan edi. Alaıda, ekinshi kezdesýinde kanadalyq Sıdhartha Bhattan utyldy. Osylaısha jerlesterimiz óz sharshy alańynda birde-bir júldege qol jetkize almady.
Jarysta qarsylas shaq keltirmeı jeńimpaz atanǵan sportshylar 5 000, ekinshi oryn ıelengen sportshylar 3 000, úshinshi oryndy enshilegender 1 000 AQSh dollaryn qaltalaryna basty.
Al, jalpykomandalyq esepte qorjyndary 2 altyn medalmen tolyqqan Qytaı quramasy bas júldeni jeńip aldy. Ekinshi orynǵa 1 altyn 2 kúmispen AQSh quramasy ıe bolsa, úzdik úshtikti 1 altyn 1 kúmis 1 qola medal oljalaǵan Iran quramasy túıindedi.
Esterińizge sala keteıik, 2013 jyly Halyqaralyq taekvondo federatsııasy (WTF) «Álemdik Gran-Prı serııasy» dep atalatyn jańa týrnırdiń tusaýyn kesken bolatyn. Bul týrnırge álemdik reıtıngtiń kóshin bastap turǵan sportshylar qatysty.
Qazaqstan taekvondo federatsııasy ótken jyly bul dúbirli dodany elimizde ótkizý týraly usynys jasaǵan edi. 2014 jyldyń 25 naýryzynda qytaılyq Taıpeıde ótken Halyqaralyq taekvondo federatsııasynyń (WTF) assambleıasynda uıym músheleri bul usynysty qarap, «Álemdik Gran-Prı serııasynyń» ekinshi kezeńin elordamyz Astanada qalasynda ótkizý týraly sheshim qabyldaǵan.
Aıta keteıik, Taıpeıde ótken assambleıaǵa álemniń 100-den astam federatsııalarynyń ókilderi qatysqan. Jıyn barysynda «Álemdik Gran-Prı serııasy» kezeńin ótkizýden ózge, aldaǵy ýaqytta búkil álemde taekvondo sportyn damytý men múmkindigi shekteýli jandarǵa arnalǵan para-taekvondo sportyna kóńil bólý týraly máseleler de qarastyrylǵan bolatyn.
Bul jolǵy básekede sportshylarymyzdyń baǵy janbaǵanymen, bul Qazaqstan quramasy úshin úlken tájrıbe jınaqtaýdyń bir múmkindigi boldy.
Kúnsultan Otarbaı
