6 myń qazaqstandyq jas 2,5 paıyzben nesıe ala alady

ASTANA. QazAqparat – Jastardy kásipke tartý úshin 6 myń azamatqa 5 jyl merzimge 2,5 paıyzben shaǵyn nesıe beriledi. Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, ol nesıeniń somasy 5 mln teńge bolmaq, dep habarlaıdy QazAqparat tilshisi.

«Jalpy respýblıka boıynsha bıyl salalyq tujyrymdamalar men ulttyq jobalar sheńberinde 75 myńǵa jýyq jumys ornyn, qarjylandyrý kólemi 131 mlrd teńge bolatyn 150 myńnan astam jumys ornyn qurý josparlanýda», - dedi mınıstr.

Onyń aıtýynsha, atalǵan jumys oryndaryn ustaý shyǵyndaryn memleket sýbsıdııalaıdy.

«780 myń adamdy jeke bastamalar sheńberinde jáne jumys berýshilerdiń bos jumys oryndaryna ornalastyrý josparlanyp otyr. Qurylatyn jumys oryndarynyń jalpy sanynyń shamamen 20% jastar men múgedektigi bar adamdardy jumysqa ornalastyrýǵa baǵyttalady.

Budan basqa, 6 myń jas azamatqa 5 jylǵa jyldyq mólsherlemesi 2,5% bolatyn 5 mln teńgege deıingi jeńildikti mıkrokredıtter beriledi. Erekshe qajettiligi bar jastarǵa jáne halyqtyń áleýmettik osal toptarynan shyqqan azamattarǵa 1,2 mln teńge mólsherinde 9 myń grant beriledi», - dedi Tamara Dúısenova vedomstvonyń keńeıtilgen alqa májilisinde.