6 mln teńgeniń «Paratsetamol» dárisin qymbat baǵada satpaq bolǵan azamat ustaldy
ALMATY OBLYSY. QazAqparat – Almaty oblysynda «Paratsetamol» dárilik preparatyn 6 mln teńgege satpaq bolǵan azamat ustaldy. Bul týraly QazAqparat Qarjy monıtorıngi komıtetine silteme jasap habarlaıdy.
2020 jylǵy 15 shildede kúsheıtilgen karantın jaǵdaıynda QR QM Qarjy monıtorıngi komıtetiniń Almaty oblysy boıynsha Ekonomıkalyq tergeý departamentiniń qyzmetkerleri jedel-izdestirý is-sharalaryn júrgizý barysynda 1993 jyly týǵan Qazaqstan azamaty ustaldy. Ol «Paratsetamol» dárilik preparatyn joǵary baǵamen (plastınasy 300 teńge) tıisti qujattarsyz zańsyz satpaq bolǵan.
Tintý kezinde 6 mln teńge somasyna «Paratsetamol» dárilik preparatynyń 20 000 plastınasy alyndy, olar sarapshy-mamannyń qorytyndysynan keıin jedel respıratorlyq aýrýlardan emdeýge odan ári paıdalaný úshin Almaty oblysy ákimdiginiń Densaýlyq saqtaý basqarmasyna tapsyrylatyn bolady.
Atalǵan fakti boıynsha QR QK 214-baby (Zańsyz kásipkerlik) boıynsha tergeý isi bastaldy.
