2026 jyldan bastap salyq tóleýshilerge kepilsiz tólem merzimin shegerý jeńildigi beriledi
ASTANA. KAZINFORM – Kelesi jyldan bastap jańa Salyq kodeksi aıasynda salyq tóleýshiler salyq bereshegin óteý merzimin kepilsiz shegerý nemese bólip tóleý múmkindigin paıdalana alady. Bul týraly QR Qarjy mınıstrligi Memlekettik kirister komıtetiniń bereshekpen jumys basqarmasy basshysynyń orynbasary Araılym Esqalıeva tikeleı efır barysynda málimdedi.
Araılym Esqalıeva atap ótkendeı, jańa Salyq kodeksinde salyq tóleýshiler úshin burynǵydaı kepil múlkin nemese bank kepildigin usyný talaby jeńildetiledi.
- Jańa Salyq kodeksi aıasynda biz kepilsiz merzimin shegerý jáne bólip tóleý tetigin engizýdi kózdep otyrmyz. ıAǵnı salyq tóleýshiler múlikti kepilge qoıýǵa nemese bank kepildigin usynýǵa mindetti bolmaıdy. Mundaǵy jalǵyz shart – salyq bereshegi 1500 aılyq eseptik kórsetkishten (shamamen 6 mıllıon teńgeden) aspaýy tıis. Osyndaı jaǵdaıda salyq tóleýshilerge 12 aıǵa deıin kepilsiz merzimin shegerý nemese bólip tóleý múmkindigi beriledi, – dep túsindirdi Araılym Esqalıeva.
Spıkerdiń aıtýynsha, jańa tártiptiń basty maqsaty ol kásipkerlerdiń ýaqytyn únemdep, rásimderdi jeńildetý.
– Búginde salyq tóleýshiler kepilge qoıylatyn múlikti baǵalap, ony joǵaltý ne búliný táýekelinen saqtandyrý rásimderinen ótedi. Biz osy protsesti jeńildetip, olardyń ýaqytyn únemdeýdi kózdep otyrmyz, – dedi ol.
Araılym Esqalıeva sondaı-aq kepilsiz merzimin shegerý nemese bólip tóleýge úmitker bolý úshin birqatar talaptardyń bar ekenin atap ótti.
– Birinshiden, salyq bereshegi 1500 AEK-ten aspaýy tıis. Ekinshiden, salyq tóleýshi retinde keminde 2 jyl tirkelgen bolýy qajet. Úshinshiden, salyq tóleýshiniń mindetti sıpattaǵy oryndalmaǵan habarlamalary bolmaýy jáne onyń qyzmeti toqtatylmaǵan bolýy shart, – dedi ol.
Sonymen qatar spıker qoldanystaǵy kodekske sáıkes, bir salyq tóleýshi birneshe ret merzimin shegerý nemese bólip tóleý rásimin qoldana alatynyn túsindirdi.
– Mysaly, eger salyq tóleýshi qazirgi tańda kepilmen nemese bank kepildigimen merzimin shegerý alsa, keıin ekinshi ret te ala alady. Biraq bul jaǵdaıda basqa múlik kepilge qoıylýy tıis. Bir múlikti qaıta kepilge qoıýǵa jol berilmeıdi, – dep naqtylady maman.
Mundaı jeńildikter kásipkerlerdiń qyzmetin shekteýge ákelmeıdi.
- Eger jeke kásipker óz mindettemesin ýaqytyly oryndaı almaıtynyn aldyn ala baıqasa, ol ótinish berip, merzimin shegerý nemese bólip tóleý rásimin qoldana alady. Bul kezde shottar buǵattalmaıdy, al tólem belgilengen keste boıynsha – aı saıyn nemese toqsan saıyn teń úlespen júrgiziledi, – dedi Araılym Esqalıeva.
Jańa norma 2026 jyldyń 1 qańtarynan bastap qoldanysqa engiziledi.
– Bul múmkindik jańa Salyq kodeksi kúshine engennen keıin, ıaǵnı 2026 jyldyń 1 qańtarynan bastap beriledi. Ótinishti barlyq salyq tóleýshiler – jeke tulǵalar, zańdy tulǵalar jáne jeke kásipkerler bere alady, – dedi spıker.
Sonymen qatar salyq mindettemesin oryndaý merzimin shegerý nemese bólip tóleý tek belgili bir jaǵdaılarda ǵana qarastyrylady.
– Ótinishti berý negizderi naqty kórsetilgen. Birinshiden, bul – fors-majorlyq jaǵdaılar: tabıǵı apattar, áskerı áreketter, áleýmettik sıpattaǵy tótenshe jaǵdaılar. Mundaı jaǵdaıda ósimpul esepteý toqtatylady. Mysaly, ótken jyly kóktemgi sý tasqyny kezinde kóptegen salyq tóleýshilerge merzimin shegerý men bólip tóleý berilip, sol kezeńde ósimpul eseptelgen joq.Ekinshiden, óndiris nemese qyzmet maýsymdyq sıpatta bolsa. Úshinshiden, jeke tulǵalar ýaqytsha qarjylyq qıyndyqtarǵa tap bolǵan jaǵdaıda. Sondaı-aq sottyń qaryzdy qaıta qurylymdaý týraly sheshimi, áleýmettik mańyzy bar kásiporyndardyń qyzmeti, qosymsha salyq eseptiligin tapsyrý nemese salyqtyq tekserý aktisindegi eseptelgen somaǵa kelisý de negiz bolyp sanalady, – dedi ol.
Aıta keterligi, eger salyq tóleýshi ótinishti salyqtyq tekserý aktisi boıynsha kelisilgen somaǵa baılanysty berse, ol keminde 5 jyl boıy tirkelgen bolýy tıis dep naqtylady Araılym Esqalıeva.
Buǵan deıin 2026 jyly dıvıdend alatyn jeke tulǵalarǵa da progressıvti salyq shkalasy qoldanylatynyn jazǵanbyz.