6 mln teńge alımentin tólemeı qashyp júrgen mańǵystaýlyq Qostanaıda qamaýǵa alyndy
AQTAÝ. KAZINFORM — Alıment boıynsha onyń 6 mıllıon teńge qaryzy bolǵan. Oǵan el aýmaǵynda izdeý jarııalanyp, aqyry balasyna bereshegin tóledi. Bul týraly Mańǵystaý oblysynyń prokýratýrasynan habarlandy.
Jańaózen qalasynyń prokýratýrasy alıment boıynsha 6 mln teńge bereshegi bar boryshkerge qatysty Qylmystyq kodekstiń 139-babymen tirkelgen qylmystyq isti sotqa joldaǵan.
Aıyptalýshy sotqa kelýden jaltarǵan.
Sondyqtan, qala prokýrorynyń ótinishimen bultartpaý sharasy qamaqqa alýǵa ózgertilip, boryshkerge izdeý jarııalandy.
— Júrgizilgen izdestirý sharalary nátıjesinde boryshker Qostanaı qalasynan tabylyp, qamaýǵa alyndy. Qazirgi ýaqytta alıment boıynsha bereshegi tolyq óteldi. Qylmystyq is qaıta qaralý úshin sotqa joldandy, — deıdi prokýratýradan.
Buǵan deıin Jetisýda balasyna alıment tólemeı júrgen boryshkerler 150 mln teńgeni qumar oıynǵa salǵanyn jazǵan edik.
Al, Soltústik Qazaqstan oblysynda balasyna alıment tólemegen 36 ata-ana qamaldy.
