6 mln otbasy «Tsıfrlyq karta» arqyly áleýmettik kómekpen qamtylady

ASTANA. QazAqparat – Eńbek jáne halyqty áleýmettik qorǵaý mınıstri Tamara Dúısenova vedomstvonyń keńeıtilgen alqa májilisinde salany damytýdyń 2023-2027 jyldarǵa arnalǵan josparyn tanystyrdy, dep habarlaıdy QazAqparat tilshisi.

Onyń aıtýynsha atalǵan jospar 5 strategııalyq baǵyttan turady.

«Birinshi strategııalyq baǵyt – tsıfrlandyrýdy tereńdetý. Ol áleýmettik qyzmetterdi kórsetýdiń ótinish nysanynan olardy usynýdyń anyqtaý jáne proaktıvti formatyna kóshýdi qamtamasyz etýge tıis. 2023 jyly baǵytty iske asyrýdyń túpkilikti nátıjesi proaktıvti qyzmetterdiń úlesin olardyń jalpy sanynyń 60%-na deıin jetkizý bolady», – dedi Tamara Dúısenova.

Ol úshin qazaqstandyq otbasylardyń memlekettik kepildikter týraly derekqory jasaqtalyp, memlekettik organdardyń aqparattyq júıelerinen málimetterdi jınaqtalmaq.

«BUU Damý baǵdarlamasy usynǵan Alkıre-Foster modelin paıdalana otyryp, otbasylardyń áleýmettik ál-aýqatyn baǵalaý 6 mıllıonnan astam otbasynyń mártebesin jáne olardyń memlekettik qoldaýdyń qandaı da bir túrlerine qajettiligin anyqtaýǵa múmkindik berdi. Tıisinshe, memlekettik organdar men jergilikti ákimder kimge, qashan, qandaı kómek kórsetý kerektigin naqty anyqtap qana qoımaı, áleýmettik táýekelderdiń aldyn alý boıynsha sharalar qabyldaýǵa múmkindigi bar», – dedi Tamara Dúısenova.