6 mln.-nan astam qazaqstandyq seısmıkalyq qaýipti aımaqtarda turady
ASTANA. QazAqparat - Qazaqstan terrıtorııasynyń úshten bir bóligi seısmıkalyq qaýipti bolyp sanalady, ol jerlerde 6 mln.-nan astam otandastarymyz ómir súrip jatyr, 400-den astam eldi meken ornalasqan, sonymen qatar óndiristik áleýettiń 40 paıyzy shoǵyrlandyrylǵan. Bul týraly búgin Tótenshe jaǵdaılardy joıý jáne aldyn alý boıynsha vedomstvoaralyq memlekettik komıssııanyń otyrysynda QR ІІM Tótenshe jaǵdaılar komıteti tóraǵasynyń orynbasary Vladımır Bekker aıtty.
«Qazaqstan terrıtorııasynyń úshten bir bóligi seısmıkalyq qaýipti bolyp sanalady, ol jerlerde 6 mln.-nan astam adam ómir súrýde, 400-den astam eldi meken ornalasqan, sonymen qatar óndiristik áleýettiń 40 paıyzy shoǵyrlandyrylǵan. Mundaı óńirlerge Almaty, Almaty oblysy, Shyǵys Qazaqstan, Jambyl, Qyzylorda, Mańǵystaý jáne Ońtústik Qazaqstan oblystary jatady», - dep atap ótti ol.
V. Bekkerdiń aıtýynsha, qandaı da bir qurylys salý barysynda sol óńirdiń seısmıkalyq jaǵdaıyn basty nazarǵa alyp, Eýropalyq normalarǵa júginý qajet. Bilim berý jáne densaýlyq saqtaý mekemelerin salý kezinde olardyń seısmıkalyq turaqtylyǵyn nyǵaıtý boıynsha arnaıy baǵdarlama qabyldaný kerek. «Qazirgi ýaqytta respýblıka boıynsha 470 mektep, 270 aýrýhana, 198 balabaqsha, 1046 áleýmettik nysan jáne 511 óndiris oryndarynyń ǵımaraty seısmıkalyq turaqtylyǵyn nyǵaıtýǵa zárý. Bir aıta keterligi, 2010-2015 jyldar aralyǵynda 101 bilim oshaǵy, 50 densaýlyq kesheni, 100 óndiris orny arnaıy turaqtandyrýdan ótkizilgen», - dedi V. Bekker.
