6 mln bólý 85: Sheneýnik tómen aılyqpen kólik alý jolyn eseptep berdi

ASTANA. KAZINFORM — Qazaqstanda qurastyrylǵan eń arzan kólik shamamen 6 mln teńge turady. Al 85 myń teńge aılyq alatyn azamat ony alý úshin qansha ýaqyt aqsha jınaýy kerek? Ónerkásip komıtetiniń basshysy Azamat Panbaev osy suraqqa jaýap berdi. 

— Qazaqstanda avtokólik óndirisimen 8 ónerkásiptik keshen aınalysady. Onyń ekeýi jeńil avtokólik óndirisine baǵdarlanǵan. Byltyr keshenderdiń óndiris kólemi 134 myńǵa jetti. Eń tómengi baǵadaǵy avtokóliktiń quny 6 mıllıonǵa jýyq, qatelespesem, — deıdi ol.

BAQ ókili Úkimet otyrysynan keıingi brıfıngide sheneýnikke: «85 myń teńge aılyq alatyn qazaqstandyq eń arzan otandyq kólikti alý úshin qansha ýaqyt aqsha jınaýy kerek?» - degen saýal qoıdy.

— Ol suraq bizdiń quziretimizde emes. Biraq matematıkalyq turǵydan alsańyz, 6 mıllıon teńgeni 85-ke bólesiz ǵoı, — dep jaýap berdi Komıtet basshysy.

Aıta keteıik, buǵan deıin Qostanaıda avtokólik qurastyrý kólemi artatyny jaıly jazǵan edik.