6 mınýt 25 sekýndta jazylǵan tarıh: Eskek esýden alǵashqy Azııa chempıondary elge oraldy
ASTANA. KAZINFORM — Qazaqstan tarıhynda akademııalyq eskek esýden Azııa oıyndarynyń alǵashqy chempıondary elge oraldy. Vladıslav ıAkovlev pen Ivan Chernýhın bastaǵan ulttyq qurama sportshylary Astanaǵa ushyp keldi.
Bul jaı ǵana kezekti altyn medal emes. Sebebi buǵan deıin Qazaqstan bul sport túrinen Azıadada altyn almaǵan. Sheshýshi jarysta Vladıslav ıAkovlev pen Ivan Chernýhın 6 mınýt 25,13 sekýnd nátıje kórsetip, Qytaı ekıpajyn 2,09 sekýndqa basyp ozdy. Qola júlde Ózbekstan sportshylaryna buıyrdy.
Sportshylardy Halyqaralyq Astana áýejaıynda jankúıerler, sport salasynyń ókilderi men jýrnalıster qarsy aldy.
— Márege jetkennen keıin jeńimpaz sezimi birden kelgen joq. Aldymen dopıng-baqylaý, qaıyqty tekserý, ólsheý sııaqty mindetti rásimderden óttik. Barlyǵy talapqa saı boldy. Sondyqtan telefondy da birden qolǵa ala almadyq. Árıne, komanda músheleri, áriptesterimiz ben jattyqtyrýshylarymyz márege jetken boıda bizdi quttyqtady. Onyń ózi erekshe sezildi. Al keshke, qonaqúıge kelgende ǵana Azııa chempıony atanǵanymyzdy sezindik. Chattar men áleýmettik jelilerde tolassyz quttyqtaýlardy kórdik. Bul óte jaǵymdy sezim. Óz sportyńa, óz ekıpajyńa degen maqtanysh paıda bolady, — dedi Vladıslav ıAkovlev Astana áýejaıynda.
Azııa oıyndaryna daıyndyq jyl basynda-aq bastalǵan. Sportshylar Túrkistanda, Temirtaýda jáne Belarýste oqý-jattyǵý jıyndaryn ótkizgen.
Jeńimpazdar Vladıslav ıAkovlev pen Ivan Chernýhın – Oral jáne Temirtaý qalalarynyń týmasy. Olar bala kezden eskek esý sportymen aınalysqan jáne qazirgi ýaqytta Túrkistan oblysynyń atynan jarystarǵa qatysyp júr.
Azııa chempıondary álemdik arenada ózderiniń basty qarsylasy kim ekenin aıtyp berdi.
— Álemde Eýropa komandalary óte myqty bolyp sanalady. Onda básekege túsetin komandalar óte kóp. Biz Azııanyń eń úzdikteri atandyq. Endigi maqsat – Eýropa, — dedi V. ıAkovlev.
Aıta keteıik, bul — Qazaqstannyń akademııalyq eskek esýden Azııa oıyndaryndaǵy alǵashqy altyny. Japonııada ótip jatqan XX jazǵy Azııa oıyndarynda Qazaqstan atynan akademııalyq eskek esýden 17 sportshy baq synady.
Qurama sapyndaǵy Vladıslav ıAkovlev pen Ivan Chernýhın altyn medal jeńip alyp, osy sport túrinen Azııa oıyndarynda Qazaqstanǵa tuńǵysh chempıondyq ataqty ákeldi.
Qazaqstandyq sportshylardyń 27 qyrkúıektegi jarys kestesin myna jerden qaraýǵa bolady.
