6 myńnan astam ota jasaǵan: Almatydaǵy balalar hırýrgi «Qurmet» ordenimen marapattaldy
ASTANA. KAZINFORM – Almatydaǵy Pedıatrııa jáne balalar hırýrgııasy ǵylymı ortalyǵynyń hırýrgııalyq blogynyń jetekshisi, Qazaqstannyń shtattan tys bas balalar hırýrgi Konstantın Haırov Prezıdenttiń qolynan «Qurmet» ordenin aldy. Dáriger marapattan keıingi áserimen bólisip, balalar hırýrgııasyndaǵy 32 jyldyq eńbek joly týraly áńgimeledi.
– Bul men úshin úlken mártebe. Mundaı marapat kez kelgen adamǵa buıyra bermeıdi. Búgin marapattalǵandardyń qatary kóp boldy, jáne bárimiz osyndaı qurmetke ıe bolǵanymyzǵa qýanyshtymyz. Kóńildi erekshe sezim kernep tur, – dedi Konstantın Haırov Aqorda kýlýarynda.
K. Haırov balalar hırýrgııasyna ómiriniń 32 jylyn arnaǵan. Onyń aıtýynsha, medıtsına salasyn tańdaýǵa mektep qabyrǵasynda júrgende-aq sheshim qabyldaǵan jáne osy ýaqytqa deıin óz tańdaýyna esh ókinbegen.
– Nelikten balalar hırýrgııasyn tańdadyńyz degen suraqty maǵan jıi qoıady. Shynymdy aıtsam, onyń naqty jaýabyn áli kúnge deıin bilmeımin. Biraq osy mamandyqqa kelip, oǵan 32 jylymdy arnadym jáne bir kún de ókingen emespin. Balalardyń densaýlyǵyn nyǵaıtyp, olardyń ata-analaryna qýanysh syılaý – men úshin úlken baqyt, – dedi hırýrg.
Óziniń eńbek jolynda Konstantın Haırov 6 myńnan astam operatsııa jasaǵan. Onyń eń kishkentaı patsıenti – nebári úsh saǵat buryn ǵana dúnıege kelgen náreste bolǵan.
– Sábıde týa bitken damý aqaýy boldy. Ádette mundaı balalar shala týǵan, denesi óte kishkentaı keledi. Árıne, mundaı sátterde qatty alańdaısyń. Barlyq dáriger óz patsıenti úshin ýaıymdaıdy, – dep bólisti ol.
Aıta keteıik, búgin Aqordada Prezıdent medıtsına qyzmetkerlerin kásibı merekesimen quttyqtady. Elimizde maýsymnyń ər úshinshi jeksenbisi – medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
Jańa Konstıtýtsııada «ult saýlyǵy» uǵymyna alǵash ret nazar aýdaryldy.
Prezıdent medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly da pikir bildirdi.
Sondaı-aq, Memleket basshysy qoǵamdyq oryndarda ádep saqtaý máselesin kóterdi.
Bıyldyń ózinde medıtsına mamandarynyń jalaqysyn ósirýge 33 mıllıard teńge bólingen.
Al Astana medıtsına ýnıversıtetine Tóregeldi Sharmanovtyń esimi beriledi.
