6 myńnan astam balaǵa qatysty mańyzdy aqpar: Qazaqstanda otandyq estý apparattary óndiriledi
ASTANA. KAZINFORM — Qazaqstanda estý qabileti buzylǵan 6 myńnan astam bala dıspanserlik esepte tur. Osy balalardy estý apparattarymen qamtamasyz etýdi jaqsartý jáne otandyq óndiristi iske qosý úshin Úkimet Densaýlyq saqtaý jáne Ónerkásip jáne qurylys mınıstrlikterine arnaıy Jol kartasyn ázirleýdi tapsyrdy.
Densaýlyq saqtaý mınıstri Aqmaral Álnazarova densaýlyq saqtaý salasyndaǵy memlekettik áleýmettik kepildikter júıesin jetildirý sharalary týraly baıandady.
2026 jyly aqysyz medıtsınalyq kómektiń kepildik berilgen kólemin qarjylandyrýǵa 1,6 trln teńge, mindetti áleýmettik medıtsınalyq saqtandyrý (MÁMS) júıesine 1,7 trln teńge qarastyrylǵan. Qarjylandyrýdyń negizgi kólemi statsıonarlyq, alǵashqy medıtsınalyq-sanıtarııalyq jáne konsýltatsııalyq-dıagnostıkalyq kómek kórsetýge baǵyttalǵan. Sonymen qatar aýyldyq densaýlyq saqtaýdy damytýǵa, joǵary tehnologııalyq medıtsınalyq kómek kórsetýge jáne onkologııalyq aýrýlardy emdeýge jumsalatyn shyǵystar ulǵaıtyldy.
Bul rette memleket saqtandyrylǵan azamattyń mártebesine qaramastan, aqysyz medıtsınalyq kómektiń kepildik berilgen kólemin aıasynda kórsetiletin medıtsınalyq kómektiń keń aýqymyn saqtap otyr. Sońǵy jyldary ambýlatorııalyq deńgeıde dári-dármekpen qamtamasyz etiletin patsıentter sany aıtarlyqtaı artty: 2018 jylǵy 1,9 mln adamnan 2026 jyly 3,4 mln adamǵa deıin ósti. Sondaı-aq emdeý tıimdiligi joǵary preparattar engizile otyryp, dárilik zattar tizimi jańartyldy.
Estý qabiletin ońaltý qyzmetteriniń qoljetimdiligine qatysty Densaýlyq saqtaý mınıstrliginiń málimetinshe, dıspanserlik esepte estý qabileti buzylǵan 6 myńnan astam bala tur. Osy kontıngentti eskere otyryp, jasyna, estý qabiletiniń buzylý dárejesine, qoldanystaǵy apparattyń bolýyna, onyń paıdalaný merzimine jáne jeke baptaý qajettiligine qaraı estý apparattarymen qamtamasyz etýdiń naqty qajettiligi aıqyndalady.
Prezıdent qoıyp otyrǵan el aýmaǵynda nashar estıtin balalarǵa arnalǵan estý apparattarynyń óndirisin shuǵyl túrde iske qosý mindetin oryndaý úshin Premer-mınıstr Oljas Bektenov Densaýlyq saqtaý, Ónerkásip jáne qurylys mınıstrlikterine tıisti Jol kartasyn ázirleýdi tapsyrdy. Qujatta otandyq óndirýshilerdi tartý, qajetti tehnologııalar transferti jáne servıstik qyzmet kórsetýdi uıymdastyrý qarastyrylatyn bolady. Óndiris bastalǵanǵa deıin ákimdikterge jergilikti bıýdjetter men bıýdjetten tys qarajat kózder esebinen balalarǵa arnalǵan estý apparattaryn satyp alýdy qarjylandyrý tapsyryldy.
Prezıdent Qasym-Jomart Toqaevtyń tapsyrmasy boıynsha qurylǵan «Qazaqstan halqyna» qory 2022 jyldan 2025 jylǵa deıingi birinshi kezeńde patsıentterdi jekelegen nozologııalar boıynsha dárilik preparattarmen qamtamasyz etý jónindegi óz mindettemelerin oryndady. Búginde Qor damýynda kemistigi bar balalarǵa arnalǵan ońaltý ortalyqtarynyń ınfraqurylymyn qarqyndy túrde damytýdy jalǵastyrýda, máselen, aýtızmi jáne basqa da aqyl-oı kemistigi bar balalarǵa arnalǵan 10 ortalyq ashyldy, onda 1 250 bala kómek alyp otyr.
Aıta keteıik, buǵan deıin estý apparatyn alý úshin endi múgedektik mártebesi talap etilmeıtinin jazdyq.
