6 myńnan 140 myńǵa deıin: Qazaqstanda páterdi saqtandyrý quny qansha
ASTANA. KAZINFORM — Qazaqstanda páterdi saqtandyrý baǵasy qalanyń qaıda ornalasqanyna, páterdiń aýdany men táýekel túrine qaraı ózgerip otyrady. Keıbir óńirde eń arzany men eń qymbatynyń arasyndaǵy aıyrmashylyq birneshe esege joǵary. Bir bólmeli páterge qaraǵanda úsh bólmeli baspanany saqtandyrý edáýir qymbatqa túsedi, dep habarlaıdy Kazinform tilshisi.
Qazaqstannyń 20 qalasyn negizge alyp bir jáne úsh bólmeli páterdi saqtandyrý qyzmetiniń baǵasyn bildik. Páterdi saqtandyrý elimizdiń qaı óńirinde arzan, al qaı oblysynda qymbat?
Bir bólmeli páter
Qazaqstan óńirleri arasynda Kókshetaý men Taraz qalasynda bir bólmeli páterdi saqtandyrý baǵasy 6 myń teńgeden bastalady. Bul elimiz boıynsha eń tómen baǵa. Aqtaý qalasynda 8 myń teńgeden bastalsa, Qaraǵandy 10 myń teńge jáne odan joǵary.
Al Shymkent qalasynda saqtandyrý polısiniń baǵasy 70 myń teńgege deıin jetti. Almaty qalasynda 55 myń teńgege deıin barsa, Taldyqorǵanda joǵary baǵa 52 myń teńge.
Astana qalasynda bir bólmeli páterdi saqtandyrý baǵasy shamamen 21-41 myń teńge aralyǵyn qamtysa, Almatyda 30-55 myń teńge aralyǵynda. Demek elimiz boıynsha bir bólmeli páterdi saqtandyrý jylyna kem degende 6 myń teńge, al keıbir óńirde 70 myń teńgege jetti.
Úsh bólmeli páter
Úsh bólmeli páter ıeleriniń shyǵyny odan da joǵary. Eń tómen baǵa Taraz qalasynda tirkeldi. Munda saqtandyrý quny 17 myń teńgeden bastalady. Kókshetaý men Pavlodar qalalarynda baǵa 19-20 myń teńge aralyǵynda bolsa, Qaraǵandy men Jezqazǵanda 20 myń teńgeden bastalady.
Úsh bólmeli páterdi saqtandyrý qyzmeti Shymkent qalasynda qymbat. Munda tipti 140 myń teńgege deıin jetedi. Qyzylordada eń joǵary baǵa 85 myń teńge, Tarazda 81 myń teńge, Qaraǵandy, Jezqazǵan men Qonaevta 80 myń teńge.
Astana qalasynda úsh bólmeli páterdi saqtandyrý úshin shamamen 40-75 myń teńge, Almatyda 50-96 myń teńge aralyǵynda tóleıdi.
Saqtandyrý qyzmeti qaıda arzan, qaı óńirde qymbat
Eger eń tómendi tarıfti salystyrsaq, bir bólmeli páterge Kókshetaý men Tarazda 6 myń teńge tóleıdi. Al Almaty qalasynda eń arzanynyń ózi 30 myń teńge bolyp tur.
Eń joǵary baǵa Shymkent qalasynda tirkeldi. Munda bir bólmeli páterdi saqtandyrý qyzmeti 70 myń teńgege, al úsh bólmeli páterdi saqtandyrý qyzmetiniń quny 140 myń teńgege deıin jetti.
Taraz qalasynda úsh bólmeli páterdi saqtandyrý baǵasy tıimdi. Shamamen 17 myń teńgeden bastalady.
Astana men Almaty qalalarynda saqtandyrý baǵasy ózge óńirlerge qaraǵanda joǵary. Tipti bir qalanyń ózinde baǵa ártúrli. Máselen, Almaty qalasynda bir bólmeli páterdi saqtandyrý baǵasy 30-55 myń teńge bolsa, úsh bólmeli páterge 50-96 myń teńge eseptep beredi.
Baǵa nege ártúrli
Saqtandyrý baǵasyna tek bólmeniń sany áser etpeıdi. Baǵaǵa páterdiń aýdany, baǵasy, úıdiń qaı jyly salynǵany, jaǵdaıy, ornalasqan jeri, saqtandyrý táýekeli, saqtandyrý somasy jáne saqtandyrý kompanııasynyń talaby áser etedi.
Saqtandyrý táýekeline órt, zilzala, sý tasqyny, jarylys, naızaǵaı, úshinshi tulǵanyń zańsyz áreketi jáne ózge de talaptar kiredi. Munyń bári kelisimshartta kórsetiledi.
Buǵan deıin Qazaqstandaǵy baspananyń 3,2% ǵana saqtandyrylǵany týraly aıtyldy. Ulttyq bank pen Qarjy naryǵyn retteý jáne damytý agenttigi Saqtandyrý naryǵyn damytýdyń 2030 jylǵa deıingi baǵdarlamasy qabyldanatynyn habarlady. Agenttiktiń málimetine súıensek, tabıǵı sıpattaǵy apattan saqtandyrý tetigi kezeń-kezeńimen iske asyrylady. Bul 2024 jyldaǵy sý tasqynynan keıin kóterilgen ózekti másele. Sol kezde memleket jóndeý, qurylys jáne úı satyp alýǵa qomaqty qarjy jumsady.
Sarapshylar óz kezeginde saqtandyrý polısin erikti túrde rásimdeý nelikten keń taralmaǵanyn túsindirdi. Qazaqstandyqtar nelikten úıin, ómirin saqtandyrýǵa asyqpaıdy, 10 jylda naryqta qandaı ózgeris bolýy múmkin ekenin de túsindirdi.
TJM habarlaýynsha, eger múlik der kezinde saqtandyrylsa, shyǵyndy saqtandyrý uıymy óteıdi. Zań jobasynda zilzala, orman órti, tasqyn men sý basýdan saqtandyrýdy mindetteý suraǵy qarastyrylyp jatyr, ıaǵnı ázirge azamattar úshin múlikti saqtandyrý erikti túrde iske asyrylady. Bul jaǵdaıda baǵaǵa nysan men tańdalǵan talap áser etedi. Alaıda zań jobasyna qarasaq, tabıǵı apattan saqtandyrý taıaýda ár múlik ıesine mindetti bolady.
