6 myń jumys ornyn ashý, ishki qun úlesi: Oljas Bektenov «Báıterek» holdıngi dırektorlar keńesiniń otyrysyn ótkizdi
ASTANA. KAZINFORM – Premer-mınıstr Oljas Bektenovtiń tóraǵalyǵymen «Báıterek» ulttyq basqarýshy holdıngi» AQ dırektorlar keńesiniń otyrysy ótti. Bul týraly Úkimettiń baspasóz qyzmeti habarlady.
Premer-mınıstrge holdıng pen onyń enshiles uıymdarynyń qoldanystaǵy quraldar sheńberinde otandyq taýar óndirýshilerdi qoldaý boıynsha 2024 jylǵy ınvestıtsııalyq jáne qarjylyq qyzmetiniń nátıjeleri týraly baıandaldy.
«Báıterek» UBH basqarma tóraǵasy Rýstam Qaraǵoıshın ekonomıkanyń shıkizattyq emes sektoryn jalpy quny 4,09 trln teńgege qarjylandyrý boıynsha qabyldanǵan sharalar týraly baıandady. Ótken jylmen salystyrǵanda qoldaý kólemi 52%-ǵa artty. Barlyǵy 58 myńǵa jýyq kvazımemlekettik sektor sýbektilerine jatpaıtyn jeke kompanııalar men uıymdar qamtyldy.
Memlekettik qoldaý sharalaryn arttyrý nátıjesinde óńirlerde 6 myńnan astam jańa jumys orny ashyldy. Óndirýshiler 7,3 trln teńgeniń ónimin shyǵardy jáne qyzmet kórsetti. Sondaı-aq eksport kólemi úshten bir esege artyp, 1,046 trln teńgeden asty. Elimizdiń agroónerkásip keshenin damytýǵa erekshe kóńil bólinip jatyr. Osylaısha, holdıng quraldary jáne onyń qurylymdary arqyly sharýalar 10,5 myń danadan astam aýyl sharýashylyǵy tehnıkasy men qural-jabdyqtaryn satyp aldy. Sondaı-aq kóktemgi egis jáne jıyn-terim jumystaryn naryq jaǵdaıynda oblıgatsııalyq qaryzdardy tartý esebinen qarjylandyrý baǵdarlamasy iske qosyldy. «Jasyl» ekonomıkany damytý maqsatynda energetıka salasynda quny 14,5 mlrd teńgeni quraıtyn 3 joba qoldaý tapty.
Premer-mınıstrge «Báıterek» UBH» AQ kompanııalar tobynyń taýarlaryn, jumystary men qyzmetterin satyp alýdaǵy ishki qun úlesin arttyrý boıynsha qabyldanyp jatqan sharalar týraly baıandaldy.
Jumystarda úles 2023 jyly 97,9%-dan 2024 jyly 99,9%-ǵa deıin, qyzmetterde 94%-dan 96%-ǵa deıin, taýarlarda 3%-dan 48%-ǵa deıin ósti.
«Báıterek» UBH» AQ kompanııalar toby boıynsha ótken jyly satyp alýdyń jalpy kólemi 54 mlrd teńgeni qurady. Bul rette otandyq óndirýshilerden 46 mlrd teńgege nemese 85%-ǵa taýarlar men jumystar jáne kórsetiletin qyzmetter satyp alyndy.
«Báıterek» ulttyq holdınginde basqarma quramy ózgergenin jazǵan bolatynbyz.