6 maýsymnan bastap birjaqty qozǵalys engizilgen kóshelerde júrgizýshilerge aıyppul salyna bastaıdy

ASTANA. QazAqparat - 6 maýsymnan bastap jol polıtsııasy birjaqty qozǵalys engizilgen kóshelerde júrgizýshilerdi jol júrý erejesin buzǵany úshin ákimshilik jaýapkershilikke tartatyn bolady.

Aıyppul mólsheri 5 AEK quraıdy.

Buryn habarlanǵandaı, apatty jaǵdaılardy boldyrmaý úshin ákimshilik polıtsııa basqarmasynyń jáne jergilikti polıtsııa qyzmetiniń ókilderi bir apta boıy kólik ıelerimen birjaqty qozǵalys erejeleri boıynsha túsindirý jumystaryn júrgizdi, dep habarlady Astana ákiminiń saıty.

Eske salaıyq, 28 mamyrda Áýezov jáne Jeltoqsan kóshelerinde birjaqty kólik qozǵalysy engizilgen bolatyn. Birinshi jol ýchaskesiniń uzyndyǵy - 2,9 km jáne Respýblıka dańǵylynan Á. Moldaǵulova kóshesine deıingi qashyqtyqty qamtıdy. Ekinshi ýchaskeniń uzyndyǵy - 2 km jáne Máskeý kóshesinen Kenesary kóshesine deıingi qashyqtyqty qamtıdy.

11 maýsymda Abaı dańǵylynda (Saryarqa dańǵylynan Pýshkın kóshesine deıin), Kenesary kóshesinde (Pýshkın kóshesinen Saryarqa dańǵylyna deıin) jáne ıAnýshkevıch kóshesinde (Abaı dańǵylynan Imanov kóshesine deıin) birjaqty kólik qozǵalysy engizilmek.