6 maýsymnan bastap Almatyda «Klassık» radıosy habar tarata bastaıdy

Bul týraly búgin Almatyda arnaıy ótkizilgen baspasóz máslıhatynda QR Halyq ártisi Jánııa Áýbákirova málim etti.

Onyń aıtýynsha, atalmysh radıo Ortalyq Azııa keńistigindegi tuńǵysh radıostansa bolmaq. «Bul radıo «Habar» agenttigi men Qurmanǵazy atyndaǵy Qazaq ulttyq konservatorııasymen birlese jasalǵan jańa medıa joba. Jańa radıonyń maqsaty - akademııalyq mýzyka mádenıetin barlyq qazaqstandyq tyńdarmandardyń ıgiligine usyný bolyp tabylady. Radıo álemdik klassıkalyq mýzyka radıosynyń úlgisi boıynsha, mátindik aqparaty meılinshe az, túrli dáýirlerge, ár túrli stılder men baǵyttarǵa jatatyn operalyq jáne sımfonııalyq mýzykadan, aspapty jáne djaz kompozıtsııalaryna deıingi kásibı mamandarmen tańdalǵan akademııalyq áýender jınaǵynan qurylatyn bolady. Biz efırge ýaqyt synynan abyroımen ótken jáne ǵasyrlar boıy úılesim men sulýlyq tartý etip kele jatqan mýzykany shyǵarǵymyz keledi. Radıo tyńdarmannyń kóńilinen shyǵady dep senemin, óıtkeni munda tek, klassıkalyq mýzykanyń hıt ánderi men áýenderi kiretin bolady. Osy jobanyń basy-qasynda 5 jyldan beri júrgen men úshin bul radıonyń ashylýy úlken qýanysh. Meniń oıymsha, radıo tyńdarmandarymyzǵa ásem áýender syılap qane qoımaı, Qazaqstan klassıkalyq óneriniń damýyna da yqpal etetin bolady»,-dedi Jánııa Áýbákirova.

Onyń pikirinshe, klassıkalyq mýzyka qoǵamymyzdyń ıntellektýaldyq áleýetin arttyrýǵa yqpal etetin bolady.

«Habar» agenttiginiń kreatıvti dırektory Erjan Súleımenovtyń aıtýynsha, klassıkalyq mýzyka radıotolqynyn qurý efırge klassıkalyq mýzykany qaıta ákelip, talǵamy joǵary tyńdarmannyń kóńilinen shyǵý bolyp tabylady.

Jobanyń prodıýsseri Raýshan Jumanııazovanyń aıtýynsha, «Classic» radıosy klassıkalyq mýzyka kontsertterin konservatorııanyń Úlken organ zalynan tikeleı berip otyratyn bolady. «Bastapqy kezeńde radıo Almaty qalasy boıynsha ǵana taratylatyn bolady, odan keıin, ýaqyt óte kele respýblıkanyń barlyq óńirlerine taralady. Habar tarata bastaǵan alǵashqy kúnnen bastap-aq, klassıkalyq mýzykanyń radıotolqyny sandyq pakette usynylady. Efırge keletin bolsaq, kúnine birneshe ret qazirgi zamanǵy qazaqstandyq jáne álemdik mýzyka mádenıeti týraly jan-jaqty maǵlumat beretin aqparattyq jáne jańalyqtar baǵdarlamalary shyǵyp turatyn bolady. Sonymen qatar uly ónerdi qadirleı biletinder úshin efırde kórnekti kompozıtorlar, ataqty oryndaýshylar, álemdik mádenıettiń altyn qoryna engen teńdessiz týyndylar týraly baǵdarlamalar, bilim berý jáne aǵartý baǵdarlamalary beriletin bolady. Aldaǵy ýaqytta radıonyń formaty aýdıtorııamen tikeleı áńgime -dúken qurý múmkindigin de qarastyrýda. Máselen josparymyzdaǵy «Mýzyka salony» baǵdarlamasynda radıo tyńdarmandary ózderiniń mýzykaǵa, oryndaýshylarǵa degen kózqarastaryn bildirip, efırge ózderiniń súıikti týyndylaryn shyǵarýdy suraı alady» ,-dedi ol.

Onyń aıtýynsha, qazirgi tańda «Klassıcheskoe ýtro», «Dyhanıe garmonıı», «Afısha», «Kontsertnyı zal» atty taqyryptyq baǵdarlamalardy Erkeǵalı Rahmadıev, Tólegen Muhamedjanov, Aqtoty Raıymqulova, Bákir Baıahýnov, Vladımır Gross, Bahtııar Amanjol syndy belgili qazaqstandyq mýzykanttar, kompozıtorlar men ónertanýshylar ázirleý ústinde. Torontodan eksklıýzıvti habarlardy «Klassıka» radıosy úshin belgili mýzykatanýshy Evgenıı Bychkov jiberip turatyn bolady. Al djazǵa arnalǵan arnaıy baǵdarlamalardy mýzykanttar - Vladımır Osıpov, Mıhaıl Balabıchev, Farhad Ibragımov, Iren Aravınalar daıyndaıtyn bolady. Jalpy radıoǵa jumys isteýge tek kásipqoı mýzykanttar tartyldy. Olar jáı ǵana mýzykanttar emes, 5 jyl boıy mýzyka taratatyn radıolardy zerttegen, onyń jumysyn óziniń bes saýsaǵyndaı biletin adamdar. Radıoda jalpy sany 10 adamnan turatyn top jumys jasaıdy»,-dedi R. Jumanııazova.

Onyń aıtýynsha stýdııa kesheni eń sońǵy zamanaýı tehnıkamen jabdyqtalǵan.

«Habar» agenttiginiń birinshi orynbasary Qanat Saharııasovtyń aıtýynsha radıony iske qosý men taratý joly úsh kezeńge josparlanǵan. «Birinshi kezeńde 6-shy shildeden bastap efırde non-stop rejımimen jeńil klassıkalyq mýzyka, tanymal fılmderge saýndtrekter oınalsa, 2 kezeńde efırge aqparattyq habarlar, sonymen qatar, mádenıet jańalyqtary saǵat saıyn shyǵatyn bolady. Al, úshinshi kezeńde habarlar kestesine arnaýly jobalar men taqyryptyq baǵdarlamalar qosylatyn bolady», -dedi ol.