6 qyrkúıekte «Qazaqstan» Ulttyq telearnasynda «Shyn júrekten» jańa realıtı-shoýy efırge shyǵady
ASTANA. QazAqparat - «Qazaqstan» teleradıokorporatsııasy jańa televızııalyq maýsymda tosyn áleýmettik joba usynbaq. Teleradıokorporatsııanyń baspasóz qyzmeti habarlaǵandaı, aldaǵy senbi, 6 qyrkúıek kúni saǵat 21.05-te «Qazaqstan» telearnasynda realıtı-shoý janrynda túsirilip jatqan «Shyn júrekten» baǵdarlamasynyń alǵashqy sany efırge shyǵady.
Atalmysh jobanyń basty maqsaty - tasada qalǵan qazirgi zamannyń batyrlary dep aıtýǵa turatyn keıipkerlerdiń erlik áreketin jan-jaqty baıandaý. Onyń óz jeke basynan ótkizgen eń qyzyqty, áserli sátteri tańdalyp alynyp, kórermender nazaryna usynylmaq.
Kóbinese meıirimdi jandar ózderiniń jaqsy isteri jaıly aıtyp jatýdy unata bermeıdi. Biraq biz osyndaı erekshe erlik, jaqsylyq ıeleri týraly eldiń bilgenin qalaımyz jáne «Shyn júrekten» arqyly sol adamdardy kópshilikke úlgi etemiz. Baǵdarlama emotsııaǵa toly. Oryndy oıyn men ádemi ázil baǵdarlamanyń kórkin ashpaq.
Basyn qaterge tigip, jalyndaǵan ot ortasynan adam ómirin qutqarǵan órt sóndirýshi, jetimdi jylatpaı, oǵan analyq qamqorlyǵyn syılaǵan asyl jan, naýqasty ajal aýzynan arashalap qalǵan dáriger, bir sózben aıtqanda, jarymjan kóńilge qýanysh syılap, aınalasyndaǵylarǵa bergeni mol, biraq, ózi tasada qalǵan jandar týraly shytyrmanǵa toly oqıǵalar jańa jobanyń arqaýyna aınalady.
Bizdiń qoǵamda ómirdiń túrli aýyrtpalyǵyn kórip, taǵdyrdyń ártúrli synaǵyna tap bolsa da, moıymaıtyn qaısar jandar jeterlik. Olar ózderi betpe-bet kelgen qıyndyqty jeńip qana qoımaı, aınalasyndaǵy adamdarǵa da qolynan kelgenshe jaqsylyq jasap, aıryqsha erik-jigerdiń, qaıyrymdylyqtyń úlgisin kórsetýde. Biraq, kóp jaǵdaıda, ondaı azamattar shet qalyp qoıyp jatady. Olardyń qajymas qaıraty, ıgi isteri men ómirlik tájirıbesi teńdesi joq jańa áleýmettik jobanyń negizine alyndy. Osyndaı meıirimdi jandardyń taǵylymdy ómirin, ónegeli eńbegi men ulaǵatty isterin dáripteý maqsatymen «Shyn júrekten» baǵdarlamasy dúnıege keldi.
Egerde siz sondaı adamdardy ómirińizde kezdestirseńiz nemese shyndyqqa janasatyn oqıǵalardyń kýágeri bolsańyz, «Qazaqstan» Ulttyq telearnasyna habarlasýyńyzdy suraımyz. Oqıǵa jelisi boıynsha, ol keıipker týraly arnaıy habar túsiriletin bolady. Bizdiń tilshiler keıipkerge tosynnan syı jasap, esten ketpes qýanysh syılamaq. Júregi altyn adamǵa baqytty sát syılaýǵa siz de at salysyńyz. Al ázirshe, jańa jobanyń keıipkerlerin tańdaý úshin baıqaý jarııalanyp otyr. Jańa baǵdarlamanyń keıipkerleri - mıllıondaǵan qazaqstandyqtardyń iltıpatyna ıe bolýǵa turarlyq marapatqa laıyq batyr jandar.
