6 qyrkúıek. Týǵan kún ıeleri

ASTANA. QazAqparat - Búgin, ıaǵnı 6 qyrkúıek kúni tulǵalardan kimder dúnıege kelgen? QazAqparat oqyrmandaryna esimder kúntizbesin usynady

ESІMDER

83 jyl buryn (1935-1995) aqyn ÓTEJANOV Májilis dúnıege keldi.

Reseı Federatsııasynda týǵan. S.M.Kırov atyndaǵy Qazaq memlekettik ýnıversıtetin (qazirgi ál-Farabı atyndaǵy Qazaq ulttyq ýnıversıteti) bitirgen.

1959 jyldan jýrnalıstıka salasynda qyzmet atqarǵan. Aýdandyq «Oktıabr týy» gazetinde jumys istegen.

«Sońǵy hat», «Ǵashyqtyń jyry» atty jyr kitaptarynyń avtory. Óleńderi «Altynjar valsi», t.b. birqatar án bolyp shyǵarylǵan.

67 jyl buryn (1951-2012 ) dombyrashy, kúıshi, Qazaqstannnyń halyq ártisi, Qurmanǵazy atyndaǵy I respýblıkalyq oryndaýshylar baıqaýynyń laýreaty ShÁMELOV Tuıaqberdi Qajygereıuly dúnıege keldi.

Batys Qazaqstan oblysynyń Jańaqala aýdanynda týǵan. Almaty konservatorııasyn (qazirgi Qurmanǵazy atyndaǵy Qazaq ulttyq konservatorııasy) bitirgen. 1970 jyldan ómiriniń sońyna deıin Qazaq akademııalyq halyq aspaptary orkestri quramynda dombyrashy, kontsertmeıster jáne jeke oryndaýshy retinde qyzmet etti.

Onyń oryndaýshylyq repertýarynda qazaq halyq kompozıtorlarynyń (Abyl, Dáýletkereı, Dına, Qurmanǵazy, Mámen , Seıtek, Táttimbet, t.b.) kúıleri boldy. Ol birneshe án-kúılerdiń avtory. Gastroldik saparmen shet elderde (Aýǵanstan, Italııa, Koreıa, Qytaı, Portýgalııa, t.b.) bolyp óner kórsetti.

54 jyl buryn (1964) ánshi ABDÝLLIN Nurlan dúnıege keldi.

Almaty qalasynda týǵan. Sáýlet-qurylys ınstıtýtyn, «Turan» ýnıversıtetin bitirgen. Dzıýdodan sport sheberligine kandıdat.

Abaı atyndaǵy opera jáne balet teatrynda ánshi, «Toıbastar» habarynyń júrgizýshisi «Qazaqmys» korporatsııasy prezıdentiniń mádenıet jónindegi keńesshisi.Atyraýdyń 70 jyldyǵyna arnalǵan merekelik sharany uıymdastyrýshy jáne qatysýshy boldy.

Almaty satıra jáne ázil konkýrsynyń laýreaty. «Azııa daýysy» halyqaralyq festıvaliniń laýreaty. «Jas qanat» konkýrsynyń dıplomanty. Qazaqstannyń eńbek sińirgen qaıratkeri.