6 qańtar men 4 aqpan aralyǵynda 21,8 myń jolaýshy koronavırýs boıynsha tekserildi

NUR-SULTAN. QazAqparat – QR Densaýlyq saqtaý mınıstrligi 5 aqpan boıynsha Qazaqstandaǵy koronavırýs ınfektsııasynyń epıdemıologııalyq jaǵdaıy týraly málimetti jarııalady, dep habarlaıdy QazAqparat mınıstrliktiń baspasóz qyzmetine silteme jasap.

«6 qańtar - 4 aqpan aralyǵynda Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıtetiniń sanıtarlyq-karantındik pýnktteriniń mamandary halyqaralyq áýejaıda jáne temirjol vokzaldaryndaǵy Qytaımen aradaǵy memlekettik shekaradan ótkizý beketterinde 21 838 jolaýshyny tekserdi», delingen habarlamada.

Baspasóz qyzmetiniń málimetinshe, QHR men shekaralas memleketterden kelgen azamattardy monıtorıngileý jalǵasyp jatyr. Máselen, 2020 jyldyń 6 qańtardan búgingi kúnge deıin elimizge 30 myń 394 adam keldi.

JRVI belgisimen 104 adam kópshilikten oqshaý aýrýhanaǵa jatqyzylǵan, onyń 71 jazylyp shyqty, qazir statsıonarlarda medıtsınalyq baqylaýda 33 adam qaldy.

Aýrýhanaǵa jatqyzylǵandardyń barlyǵynyń synamasyn qosymsha baqylaý úshin Almatydaǵy Aıqymbaev atyndaǵy asa qaýipti juqpaly aýrýlardyń ulttyq ǵylymı ortalyǵyna jiberildi. Bul ortalyq jańa koronavırýsty PTR-dıagnostıkalaý ádistemesi ıgergen.

Mınıstrlitiń málimetinshe, elimizde terapııa úshin qajetti dári-dármek pen medıtsınalyq buıymdar bar, juqpaly aýrýhanalardy oqshaýlaýǵa arnalǵan bokstar, arnaıy dárigerlik jáne orta medıtsınalyq personal daıyndalǵan.

Resmı aqparatty Densaýlyq saqtaý mınıstrliginiń áleýmettik jelidegi paraqshasynan oqýǵa bolady jáne kez kelgen suraq boıynsha 1406 baılanys ortalyǵy táýlik boıy jumys isteıdi.