6-qabattan qulaǵan jasóspirim qyzdyń isi boıynsha jańa málimet anyqtaldy
Oqıǵa 23 aqpan kúni bolǵan. Túrkistan qalasy polıtsııa basqarmasynyń «102» pýltine qonaq úılerdiń biriniń 6-qabatynan jas qyz sekirip ketkeni týraly habarlama túsken. Atalǵan fakti Qylmystyq kodekstiń 105-baby («Ózin-ózi óltirýge deıin jetkizý») boıynsha Sotqa deıingi tergep-tekserýdiń biryńǵaı tizilimine tirkelgen. Almaty qalasynda turatyn qyz oqıǵa ornynan aýrýhanaǵa jetkizilgen. Keıin onyń 2005 jyly týǵan kámelet jasyna tolmaǵan jasóspirim ekeni anyqtaldy.
«Jaýap alýǵa jetkizilgen er jigittiń aıtýynsha,»jeńil júristi» jas qyz onymen áleýmettik jeli arqyly tanysyp, aldyn ala kelisim boıynsha esepshotqa aqsha aýdartyp, qonaq úıge óz erkimen kelgen. Alaıda, qonaqúı ishindegi bólmede olardyń arasynda ózara túsinispeýshilik týyndap, qyz aýdarylǵan aqshany qaıtarýdan bas tartqan.
Aqshany qaıtarý maqsatynda jigit atalǵan qyzben sóılesý úshin qonaq úıge tanys qyzyn shaqyryp, ózi ketip qalǵan. Bul beınekameradaǵy jazbalar arqyly rastaldy.
Jaýap alý kezinde jas qyzdardyń aıtýynsha, jábirlenýshi uıaly telefonmen sóılesý úshin qonaq úıdiń balkonyna shyǵyp, ózi sekirip ketken.
Al jábirlenýshi óz jaýabynda janjaldyń bolǵanyn rastap, ony sóılesken qyzdardyń biri ıterip jibergenin aıtty», - delingen polıtsııa habarlamasynda.
Atalǵan oqıǵa boıynsha anyqtalǵan jańa málimetterdi tekserý úshin qylmystyq is QR QK-niń 105-babynan 24-99-babyna («Kisi óltirýge oqtalý») aýystyryldy.
«Tergeý barysy oblys prokýrorynyń jáne polıtsııa departamenti bastyǵynyń erekshe baqylaýynda bolady.
Polıtsııa departamenti barsha azamattardy tek resmı derekkózge súıenýge shaqyrady», - delingen Túrkistan oblysy PD-niń baspasóz qyzmetiniń aqparatynda.
