6 eldiń boksshylary Asqar Qulybaevtyń júldesi úshin týrnırge qatysýda
ASTANA. QazAqparat - Atyraýda QR boks federatsııasynyń qurmetti prezıdenti Asqar Qulybaevtyń júldesi úshin dástúrli halyqaralyq týrnır jalaýyn kóterdi, dep habarlaıdy QazAqparat.
Federatsııa baspasóz qyzmetiniń málimetine qaraǵanda, 2017 jylǵy jarysqa Ázerbaıjan, Reseı, Sırııa, Ózbekstan, Qyrǵyzstan jáne Qazaqstannan 100 boksshy qatysyp jatyr. Atalǵan týrnır Hıýaz Dospanova atyndaǵy muz aıdyny saraıynda ótýde.
Sportshylarǵa bokstan KSRO-nyń 5 dúrkin chempıony Bolat Temirov jáne Rıo Olımpıadasynyń chempıony Danııar Eleýsinov sáttilik tiledi.
Sporttyq sharanyń birinshi kúninde jekpe-jekter 60,64 jáne 69 kelige deıingi salmaq dárejesinde boldy. Bul sanattarda básekelestiń deńgeıi joǵary, ıaǵnı 60 kelige deıingi dárejede 15 boksshy, 64-ke deıingi salmaqta 16 bylǵary qolǵap sheberi tartysqa túsip jatyr. Al 81 kelige deıingi sanatta tek úsh boksshy baqtaryn synaıtyn bolady.
Aldyn ala jekpe-jekterde elordalyq komandanyń ókili Darhan Jumsaqbaev Qyrǵyzstannan kelgen qarsylasy Erjan Turǵynbekovten basym tústi. Almaty oblysy atynan shyqqan Roman Şegrınov reseılik Dınıslam Saıpýlaevty jarys jolynan shyǵardy. Saıat Muratbektiń ózbek boksshysy Farhod Pavlanovpen bolǵan jekpe-jegi 4:1 esebimen Shyǵys Qazaqstan ókiliniń paıdasyna sheshildi. Osyndaı eseppen Almaty oblysy komandasynyń ókili Andreı Leıhner sharshy alań ıesi Qambar Ǵınııatovty jeńdi.
Týrnırdiń aqtyq saıysy 5 shildede tústen keıin bastalady. Jarystyq barlyq kúninde onlaın-translıatsııany kfb.kz saıty júrgizedi.
