6 aıda Qytaı eksporty men Qazaqstan ımporty arasyndaǵy alshaqtyq 3,3 mlrd $ boldy

2023 jyldyń 6 aıynda Qytaı eksporty men Qazaqstan ımporty arasyndaǵy alshaqtyq 3,3 mlrd dollarǵa jetti, dep habarlaıdy QazAqparat tilshisi. 

«Qytaı Halyq Respýblıkasynyń eksporty men Qazaqstan Respýblıkasynyń ımporty arasyndaǵy alshaqtyq 2023 jyldyń 1-jartyjyldyǵynyń aınaly statıstıkasy boıynsha 31,8 paıyz nemese 3,3 mlrd dollar. Qytaı Halyq Respýblıkasymen aınaly statıstıkadaǵy alshaqtyqty azaıtý maqsatynda shekara mańyndaǵy ótkizý pýnktterinde baqylaý kúsheıtildi. Qun táýekel ındıkatorlary qaıta qaraldy», - dep atap ótedi Memlekettik kirister komıteti agenttiktiń resmı saýalyna bergen jaýabynda.

Vedomstvo málimetinshe, «Táýekelderdi basqarý júıesi» aqparattyq júıesinde sýbektige baǵyttalǵan kózqaras jáne derekterdi ınntelektýaldy óńdeý engizilip jatyr.

«2022 jyldyń qorytyndysy boıynsha «Qazaqstan ımporty – Qytaı eksporty» baǵyty boıynsha Qazaqstan men Qytaıdyń statıstıkalyq derekteri arasyndaǵy alshaqtyq 9,2 paıyzdyq kórsetkishke (2021 jyly 41,1 paıyzdan 2022 jyly 31,9 paıyzǵa deıin) qysqardy», - dep atap ótedi komıtetten.