6 aıda balalardy ońaltý tósekteriniń sany 2 ese artty - DSM

ASTANA. QazAqparat – 6 aıdyń ishinde eldegi balalardy ońaltýmen aınalysatyn mekemelerdegi tósek orynnyń sany 2 ese artqan, dep habarlaıdy QazAqparat tilshisi.

Bul týraly QR Densaýlyq saqtaý mınıstri Ajar Ǵınııat Úkimettiń otyrysynda málim etti.

Úkimet basshysy Álıhan Smaıylov mınıstrden balalardy ońaltý isin damytý barysy týraly surady.

«Balalardyń ońaltý emin byltyrǵymen salystyrǵanda 2 ese arttyrdyq. Búgingi tańda 41 ońaltý ortalyǵy bar. Soǵan qosa osy 6 aıdyń ishinde 8 ońaltý ortalyǵy ashyldy. Sonymen birge osy salany qarjylandyrý kólemin ósirip otyrmyz», - dedi mınıstr.

Aıtýynsha, byltyrǵa qaraǵanda balalar ońaltý sharalarymen 18 paıyz kóp qamtylyp otyr.

«Qarjylandyrý 27 paıyzǵa ósti. Bıyl birinshi ret shala týǵan, týa bitken kemshilikpen týǵan balalar úshin erte aralasý ortalyqtary ashyldy. Buryn mundaı ortalyqtar bolmaǵan. 6 aıdyń ishinde sondaı 2 ortalyq ashyldy. Búkil respýblıka boıynsha jyldyń aıaǵyna deıin 3 ortalyq ashamyz dep josparlap otyrmyz. Kelesi jyly búkil aımaqtarda 13 ortalyq ashylady. Bul jumys baqylaýda. Qazirgi tańda osy balalarǵa kómek kórsetettin kereýettiń kólemi 2 ese artyp otyr, - dedi Ajar Ǵınııat.