6 aıda 17,5 tonna esirtki tárkilendi — ІІM
ASTANA. KAZINFORM — Bıyl 6 aıda elimizdiń aýmaǵynda 4 myńnan astam esirtki qylmysy tirkeldi. Bul týraly ІІM Esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov aıtty.
«Birinshi jartyjyldyqta 4 079 qylmystyq esirtki quqyq buzýshylyǵy anyqtaldy. Esirtki satýdyń 1 048 faktisiniń jolyn kestik. Bul ótken jylǵa qaraǵanda úsh ese kóp. Sondaı-aq esirtki zattaryn asa iri kólemde saqtaýdyń 254 faktisiniń joly kesildi. 6 uıymdasqan qylmystyq toptyń jetekshilerine jáne múshelerine qatysty 11 qylmystyq is qozǵaldy. Esirtkini Internet arqyly satý faktileri boıynsha 371 qylmys tirkeldi. Esirtkini jarnamalaý jáne nasıhattaý faktileri boıynsha 46 sotqa deıingi tergep-tekserý óndirisi qozǵaldy», — dedi ol vedomstvoda ótken brıfıngte.
Onyń dereginshe, 31 esirtki zerthanasy joıyldy. Olardyń 17-si sıntetıkalyq esirtki óndirýmen aınalysqan. Esirtki óndirýshilerden 186 kelige jýyq tutynýǵa daıyn sıntetıkalyq esirtki jáne 2 tonnadan astam prekýrsor tárkilendi.
«Tárkilenetin sıntetıkalyq esirtki mólsheriniń jyldan-jylǵa artyp kele jatqanyn atap ótkim keledi. Tek birinshi jartyjyldyqta 355 keliden astam osyndaı psıhıkalyq belsendi zattardyń nemese 700 myńnan astam bir rettik dozanyń qala kóshelerine ótip ketýine jol berilmedi. Bul máseleniń kúrdeliligin túsiný úshin aıta keteıin, osy esirtkiniń 1 grammyn satqany úshin 15 jylǵa deıin bas bostandyǵynan aıyrý kózdeledi. Barlyǵy 17,5 tonna esirtki, onyń ishinde 3,2 tonna marıhýana jáne 426 keli gashısh tárkilendi», — dedi Baqytjan Ámirhanov.
